काठमाडौं । संघीय मामिला तथा सामान्य प्रशासनमन्त्री राजकुमार गुप्ताले अडियो काण्ड सार्वजनिक भएपछि पदबाट राजीनामा दिएका छन्। उनीमाथि भ्रष्टाचारको गम्भीर आरोप लागेपछि चौतर्फी दवावका बीच उनले राजीनामा दिएका हुन्।
हालै सार्वजनिक अडियोमा मन्त्री गुप्ता कास्कीको भूमि आयोगको अध्यक्ष नियुक्तिको सन्दर्भमा आर्थिक लेनदेनको कुरा गरिरहेका सुनिन्छन्। सोही अडियोमा पोखरास्थित एउटा विवादित जग्गासम्बन्धी छलफल पनि समावेश छ। स्रोतका अनुसार, मन्त्री गुप्ताले नियुक्ति सुनिश्चित गरिदिने भन्दै केही रकम पनि लिइसकेको खुलासा अडियोमा गरिएको छ।
सार्वजनिक चासो बढ्दै गएपछि विपक्षी दलहरूले उनको तत्काल राजीनामा र कानुनी कारबाहीको माग गरेका थिए। यस्तै, गुप्ताले मालपोत कार्यालयहरूमा फोन गरेर ‘सहयोग माग्ने’, र इच्छाअनुसार काम नभए सरुवा गरिदिने धम्की दिने जस्ता आरोपहरू समेत सार्वजनिक भएका छन्।
विवाद चुलिँदै गएपछि मन्त्री गुप्ताले अन्ततः राजीनामा दिएका हुन्। तर उनले आफ्नो बचाउमा कुनै औपचारिक टिप्पणी गरेका छैनन्।
प्रकाशित मिति: मंगलबार, असार ३१, २०८२
-1752488768.JPG)
