भारतको उत्तराखण्ड राज्यमा मंगलबार र बुधबार आएको भीषण बाढी र पहिरोमा परेर जाजरकोट, जुम्ला र बर्दियाका कम्तीमा १८ नेपाली मजदुर सम्पर्कविहीन भएका छन् । स्थानीय तहहरूले तत्काल उद्धार र खोजतलासका लागि नेपाल सरकार र भारतीय निकायसँग आग्रह गरेका छन् ।
मंगलबार ‘क्लाउड बर्स्ट’ का कारण उत्तरकाशी जिल्लाको धराली बजारमा आएको बाढीले जाजरकोटको कुशे गाउँपालिकाका १३ जना बेपत्ता भएका छन् । टालेगाउँका कर्णबहादुर सिंह, रामबहादुर सिंह, मानबहादुर सिंह, निम सिंह र रविन सिंहसहित अन्य सातजनाको अवस्था अज्ञात छ । गाउँपालिकाले बेपत्ता मजदुरहरूको नाम–ठेगाना संकलन गर्दै संघीय सरकारसँग सहकार्य गरिरहेको जनाएको छ ।
यस्तै, जुम्ला तिला गाउँपालिकाका जनकबहादुर शाही र रुकुम घर भएका एक व्यक्ति पनि सम्पर्कविहीन छन् । ती सबै मजदुर ३–४ महिनाअघि भारत मजदुरीका लागि गएका थिए ।
बुधबार, उत्तराखण्डको पौडी गढवालमा खसेको पहिरोले बर्दियाको मधुवन नगरपालिकाका ५ नेपालीलाई बगाएर बेपत्ता बनाएको छ । हराउनेहरूमा नरेन्द्र खड्का, उनकी श्रीमती सरस्वती, २ वर्षीय छोरा रोमन, अमृता परियार र सुवास विक रहेका छन् । उनीहरू सडक निर्माणस्थल नजिक टेन्टमा बसिरहेका बेला पहिरो खसेको हो ।
स्थानीयहरूका अनुसार, निरन्तरको वर्षाका कारण पहिरोको जोखिम बढेको थियो । उद्धारकर्मीहरूले घटनास्थलमा खोजतलास जारी राखेका छन् । दिल्लीस्थित नेपाली दूतावासले दुबै घटनामा नेपाली नागरिकको अवस्थाबारे भारतीय अधिकारीसँग सम्पर्क गरिरहेको जनाएको छ ।
सम्पर्कविहीनको सूची
जाजरकोट, कुशे गाउँपालिका: कर्णबहादुर सिंह, रामबहादुर सिंह, मानबहादुर सिंह, निम सिंह, रविन सिंह, अन्य ७ जना नाम अज्ञात
जुम्ला, तिला गाउँपालिका: जनकबहादुर शाही
बर्दिया, मधुवन नगरपालिका: नरेन्द्र खड्का, सरस्वती खड्का, रोमन खड्का, अमृता परियार, सुवास विक
प्रकाशित मिति: शुक्रबार, साउन २४, २०८२
