काठमाडौं । नेपाली कम्युनिस्ट पार्टी (नेकपा) ले यसअघि पार्टी संयोजक पुष्पकमल दाहाल ‘प्रचण्ड’ ले जितेको गोरखा क्षेत्र नम्बर २ बाट यसपटक युवा नेता लेखनाथ न्यौपानेलाई उम्मेदवार बनाउने तयारी गरेको छ।
माओवादी जनयुद्धकालमा अनेरास्ववियु (क्रान्तिकारी) को अध्यक्ष रहेर राष्ट्रिय राजनीतिमा उदाएका न्यौपानेलाई चुनावी मैदानमा उतार्न स्वयं प्रचण्डले नै संकेत दिएको स्रोतले जनाएको छ। पार्टीभित्र वैचारिक रूपले स्पष्ट, संगठनमा जमेका र अहिलेसम्म कुनै संसदीय वा राजकीय पद नसम्हालेका नेताका रूपमा न्यौपानेलाई हेरिँदै आएको छ।
नेकपाको गोरखा जिल्ला कमिटीबाट आएको प्रस्तावका आधारमा न्यौपानेलाई उम्मेदवार बनाउने तयारी अघि बढाइएको हो। उनी गोरखा–२ कै स्थायी बासिन्दा भएकाले स्थानीय स्तरमा पनि राम्रो स्वीकार्यता रहेको पार्टीको बुझाइ छ।
उक्त क्षेत्रमा उम्मेदवारीका लागि नारायणकाजी श्रेष्ठ र हितराज पाण्डेको नाम पनि प्रारम्भिक छलफलमा आएको थियो। तर हितराज पाण्डेले यसपटक चुनाव नलड्ने स्पष्ट गरिसकेका छन्। त्यस्तै, राष्ट्रिय सभाको कार्यकाल सकिन लागेका नारायणकाजी श्रेष्ठ पनि गोरखा–२ बाट उम्मेदवार नबन्ने बताइएको छ।
यससँगै पार्टीभित्र नेतृत्व हस्तान्तरण र युवा पुस्तालाई अघि सार्ने रणनीतिअनुसार न्यौपानेलाई प्रतिस्पर्धामा उतार्ने तयारी भएको नेताहरूको भनाइ छ। गोरखा–२ प्रचण्डको राजनीतिक रूपमा बलियो आधार क्षेत्र मानिँदै आएको छ, जसका कारण यहाँको उम्मेदवार चयनलाई नेकपाले विशेष महत्त्व दिएको छ।
पार्टीले औपचारिक घोषणा भने आगामी दिनमा गर्ने तयारी गरेको जनाएको छ।
प्रकाशित मिति: मंगलबार, पुस २२, २०८२
