काठमाडौं । भदौ २३ र २४ गते भएका घटनासम्बन्धी छानबिन गरिरहेको जाँचबुझ आयोगले नेकपा एमाले अध्यक्ष केपी शर्मा ओलीलाई बयानका लागि बोलाउने तयारी गरेको छ।
प्रधानमन्त्री तथा मन्त्रिपरिषद् कार्यालय बाहिर बिहीबार सञ्चारकर्मीसँग कुरा गर्दै आयोगका अध्यक्ष गौरीबहादुर कार्कीले जेन–जी आन्दोलनसँग सम्बन्धित विषयमा ओलीलाई बयानका लागि पत्र पठाउने तयारी भइरहेको जानकारी दिए।
‘हामी ओलीलाई बोलाउने प्रक्रियामा छौँ,’ कार्कीले भने।
ओली उपस्थित नभए के हुन्छ भन्ने सञ्चारकर्मीको प्रश्नमा उनले भने, ‘नआउनु भयो भने त्यसबेला के गर्ने भन्ने निर्णय त्यही बेला हुन्छ। अहिले हामी पत्र काट्ने तयारीमा छौँ।’
उनका अनुसार, निवर्तमान गृहमन्त्री रमेश लेखकको बयान लिइसकिएको छ र बयान सकिएसँगै उनीमाथि लगाइएको स्थान हद फुकुवा गर्ने तयारी पनि भइरहेको छ।
कार्कीले थपे, आयोगलाई दिइएको थप एक महिनाको समयभित्रै प्रतिवेदन बुझाइनेछ। ‘म्याद थपिएको छ, सोही अवधिभित्र प्रतिवेदन तयार पारेर बुझाउँछौं,’ उनले भने।
प्रकाशित मिति: बिहीबार, पुस १७, २०८२
