काठमाडौं । सरकारले गृह सचिवसहित सात जना सचिवको सरुवा गरेको छ। शुक्रबार बसेको मन्त्रिपरिषद् बैठकले गृह सचिव रामेश्वर दंगाललाई तीन महिनामै जिम्मेवारीबाट हटाउँदै लोक सेवा आयोगमा सरुवा गर्ने निर्णय गरेको हो।
दंगाललाई यसअघि जेन–जी आन्दोलनपछिको अन्तरिम सरकारले रक्षा सचिवबाट गृह सचिवमा ल्याएको थियो। उनको स्थानमा प्रधानमन्त्री तथा मन्त्रिपरिषद् कार्यालयका सचिव राजकुमार श्रेष्ठलाई गृह सचिवको जिम्मेवारी दिइएको छ। श्रेष्ठ यसअघि लोक सेवा आयोगका सचिव थिए।
यसैगरी, श्रम, रोजगार तथा सामाजिक सुरक्षा मन्त्रालयका सचिव डा. कृष्णहरि पुष्करलाई उपराष्ट्रपतिको कार्यालयमा सरुवा गरिएको छ भने दीपक काफ्लेले श्रम मन्त्रालयको जिम्मेवारी पाएका छन्।
युवा तथा खेलकुद मन्त्रालयका सचिव डा. हरि लम्साललाई राष्ट्रपतिको कार्यालयमा सरुवा गरिएको छ भने उपराष्ट्रपति कार्यालयका सचिव लोकनाथ पौडेललाई युवा तथा खेलकुद मन्त्रालयको सचिव बनाइएको छ।
त्यस्तै, लोक सेवा आयोगका सचिव किरणराज शर्मालाई प्रधानमन्त्री तथा मन्त्रिपरिषद् कार्यालयमा ल्याइएको छ।
प्रकाशित मिति: सोमबार, पुस १४, २०८२
