काठमाडौं । राष्ट्रिय स्वतन्त्र पार्टी (रास्वपा)सँग एकताको सहमति गरेपछि काठमाडौँ महानगरपालिकाका मेयर बालेन शाह पक्षले समानुपातिक सांसदका लागि ७० जनाको प्रारम्भिक सूची तयार पारेको छ। उक्त सूची अन्तिम टुंगोमा पुर्याउन रास्वपा सभापति रवि लामिछाने र बालेन शाहबीच छलफल हुने भएको छ।
आइतबार बिहान रवि–बालेनबीच एकताको सहमति भएसँगै दुवै पक्ष समानुपातिक उम्मेदवार छनोट प्रक्रियामा जुटेका हुन्। निर्वाचन आयोगले समानुपातिकतर्फ ११० जनाको नाम बुझाउन दिएको समयसीमा भोलिसम्म रहेको छ।
बालेन निकट स्रोतका अनुसार तयार पारिएको सूचीमा ७० देखि ८० जनासम्मको नाम समावेश गरिएको छ। ती नामहरूबाट अन्तिम छनोट गर्दा योग्यता, क्षमता, समावेशिता र प्रतिनिधित्वका आधारमा निर्णय गरिनेछ।
‘हामीले पठाउने सूचीमध्येबाट कुन उपयुक्त भन्ने निर्णय सभापति र संसदीय दलका नेताले मिलेर गर्नुहुन्छ,’ स्रोतले भन्यो, ‘अनुभव र नयाँ पुस्ताको सन्तुलन मिलाएर नाम टुंग्याइनेछ।’
रवि–बालेनबीच युवापुस्ता (जेन–जी) र अनुभवी व्यक्तिहरूको संयोजनमा संसदमा प्रभावकारी भूमिका खेल्न सक्ने व्यक्तिहरूलाई अघि सार्ने सहमति भएको बताइएको छ।
बालेन पक्षका अनुसार अन्तिम सूचीमा उनीहरूको समूहबाट कम्तीमा ४० देखि ५० जना पर्ने अपेक्षा गरिएको छ। अनुकूल अवस्था बनेमा ५५–६० जनासम्म पुग्न सक्ने आँकलन गरिएको छ।
‘योग्य र भरोसायोग्य मान्छे संसदमा पठाउने साझा लक्ष्य हो,’ स्रोतले भन्यो, ‘यसमा दुवै पक्षबीच राम्रो समझदारी छ।’
प्रकाशित मिति: आइतबार, पुस १३, २०८२
