काठमाडौं । उज्यालो नेपाल पार्टीले आफ्नो पहिचान मेटिने गरी कुनै पनि दलसँग एकता नगर्ने स्पष्ट निर्णय गरेको छ। शुक्रबार बसेको केन्द्रीय समिति बैठकले आत्मसमर्पणको शैलीमा हुने एकता अस्वीकार गर्दै आवश्यक परे एक्लै चुनावी मैदानमा उत्रिने निष्कर्ष निकालेको हो।
बैठकमा पार्टीका संरक्षक कुलमान घिसिङले रास्वपा (राष्ट्रिय स्वतन्त्र पार्टी) को रणनीतिबारे ब्रिफिङ गर्दै भने, “कुलमान र बालेन आउँदैछन् भन्ने हल्ला चलाएर रास्वपाले आफ्नो जनसमर्थन बढाउन खोजिरहेको देखिन्छ, तर अस्तित्व स्वीकार्ने विषयमा उनीहरू गम्भीर छैनन्।”
उनका अनुसार रास्वपासँगको छलफलमा पार्टीको नाम, चुनाव चिन्ह वा नेतृत्वको विषयमा सहमति बन्न सकेन। “रास्वपाको नियत सहयोगभन्दा पनि प्रयोग गर्ने खालको देखियो,” उनले बैठकमा बताए।
बैठकमा सहभागी अधिकांश नेताहरूले अस्तित्व सुरक्षित नभएसम्म एकतामा नजाने र आवश्यक परे एक्लै चुनाव लड्ने मत राखेका छन्। नेताहरूको बुझाइमा एक्लै मैदानमा उत्रिँदा पनि सिक्ने वा जित्ने दुवै सम्भावना रहन्छ।
कुलमानले बालेन शाहमाथि पनि रास्वपाबाट धोका हुन सक्ने आशंका व्यक्त गरे। उनका अनुसार बालेनले रवि लामिछानेलाई पाँच वर्ष प्रधानमन्त्री बनाउने ग्यारेन्टी मागे पनि त्यसबारे रास्वपाले कुनै औपचारिक निर्णय गरेको छैन।
बैठकले समान हैसियत र पारस्परिक सम्मानका आधारमा हुने सहकार्यका लागि ढोका खुला राख्ने निर्णयसमेत गरेको छ। आवश्यक संवाद अघि बढाउन पार्टी अध्यक्षलाई अधिकार प्रदान गरिएको छ।
प्रकाशित मिति: शनिबार, पुस १२, २०८२
-1766845861.jpg)
