काठमाडौं । आगामी प्रतिनिधिसभा निर्वाचनलाई केन्द्रमा राख्दै ऊर्जा, भौतिक पूर्वाधार तथा सहरी विकासमन्त्री कुलमान घिसिङ र काठमाडौं महानगरका मेयर बालेन शाहबीच भेटवार्ता भएको छ। बिहीबार बिहान दुवैबीच एक्लाएक्लै छलफल भएको हो।
फागुन २१ गते तय प्रतिनिधिसभा निर्वाचनलाई लक्षित गर्दै दुवै नेताले आ–आफ्नो राजनीतिक सक्रियता बढाइरहेका छन्। यही सन्दर्भमा भएको भेटमा चुनावी सहकार्य, शक्ति बाँडफाँट (पावर सेयरिङ) लगायत विषयमा समग्र ‘प्याकेज’ सहमतिका सम्भावनाबारे छलफल भएको बताइएको छ।
कुलमान निकट स्रोतका अनुसार छलफल सकारात्मक भए पनि ठोस निष्कर्ष भने निस्किएको छैन।
‘संवाद चलिरहेको छ, विभिन्न सरोकारवालासँग कुरा भइरहेका छन्,’ स्रोतले नेपालखबरसँग भन्यो, ‘बालेनसँग पनि प्याकेजमै सहमति जुटाउने प्रयास भइरहेको छ।’
बालेन शाहले आगामी निर्वाचनमा आफूलाई प्रधानमन्त्रीको उम्मेदवारका रूपमा अघि सार्ने तयारी गरिरहेका छन् भने कुलमान घिसिङ पनि आफूलाई प्रधानमन्त्रीको वैकल्पिक अनुहारका रूपमा प्रस्तुत गर्न खोजिरहेका छन्।
यसअघि पनि मंसिर १४ गते दुवैबीच भेट भएको थियो। त्यसपछि बालेनले राष्ट्रिय स्वतन्त्र पार्टीका सभापति रवि लामिछानेसँग समेत भेटघाटलाई तीव्र बनाएका छन्।
प्रकाशित मिति: बिहीबार, पुस १०, २०८२
