काठमाडौँ । राष्ट्रिय प्रजातन्त्र पार्टी (राप्रपा) का प्रवक्ता तथा निवर्तमान सांसद ज्ञानेन्द्र शाही आगामी फागुन २१ गते हुने प्रतिनिधि सभा निर्वाचनका लागि ६ वटा निर्वाचन क्षेत्रबाट उम्मेदवारका रूपमा सिफारिस भएका छन्। पार्टीका विभिन्न क्षेत्रीय समितिहरूले उनलाई प्रत्यक्षतर्फको उम्मेदवार सिफारिस सूचीमा समेटेका हुन्।
जुम्ला जिल्लाबाट शाहीको नाम प्रत्यक्षतर्फ एकल रूपमा सिफारिस गरिएको छ। यसअघि पनि जुम्लाबाट अत्यधिक मतसहित विजयी भएका शाहीका लागि जिल्लाका कार्यवाहक अध्यक्ष देवीकृष्ण न्यौपानेले पार्टी सचिवालयमा सिफारिस पत्र पठाएका छन्। सोही पत्रमार्फत समानुपातिकतर्फ १४ जनाको नाम समेत पठाइएको छ।
ललितपुर क्षेत्र नम्बर १ बाट शाहीलाई प्रत्यक्षतर्फ पहिलो प्राथमिकतामा राखेर सिफारिस गरिएको छ। ललितपुर १ का राप्रपा अध्यक्ष विक्रम लामाले शाहीसँगै परशुराम सिलवाल र रविन घिमिरेको नाम पनि केन्द्रमा पठाएका छन्।
भक्तपुर क्षेत्र नम्बर १ बाट पनि शाहीको नाम सिफारिस भएको छ। भक्तपुरका राप्रपा अध्यक्ष अर्जुन कार्कीले प्रत्यक्षतर्फ शाहीलाई सिफारिस गरिएको जानकारी दिएका छन्।
त्यसैगरी, सुर्खेत क्षेत्र नम्बर २ बाट शाही पहिलो नम्बरमा सिफारिस भएका छन्। क्षेत्रीय अध्यक्ष कर्णबहादुर रेगामी मगरले पठाएको सिफारिसमा प्रत्यक्षतर्फ शाहीसहित चार जनाको नाम समावेश छ।
रुपन्देही क्षेत्र नम्बर २ बाट गरिएको सिफारिसमा पनि शाहीको नाम परेको छ, जहाँ उनलाई प्रत्यक्षतर्फ सातौँ प्राथमिकतामा राखिएको छ। कञ्चनपुर क्षेत्र नम्बर २ बाट समेत शाही उम्मेदवारका रूपमा सिफारिस भएको जानकारी स्वयं शाहीले दिएका छन्।
उम्मेदवारको अन्तिम निर्णय भने पार्टी केन्द्रले गर्ने जनाएको छ।
प्रकाशित मिति: बुधबार, पुस ९, २०८२
