काठमाडौं । राष्ट्रिय स्वतन्त्र पार्टीका सभापति रवि लामिछाने र काठमाडौं महानगरका मेयर बालेन शाहबीच सातबुँदे सहमति भएपछि नेपाली राजनीतिमा नयाँ तरंग देखिएको छ। यद्यपि, उक्त सहमतिबाट अलग रहेका उज्यालो नेपाल पार्टीका संरक्षक तथा ऊर्जा मन्त्री कुलमान घिसिङले भने अझै पनि नयाँ राजनीतिक शक्तिहरूबीच एकता सम्भव रहेको बताएका छन्।
पोखरामा आयोजित पार्टी भेलामा बोल्दै कुलमानले अहिले सहमति नहुँदैमा सबै कुरा समाप्त भइसकेको अर्थ नलाग्ने स्पष्ट पारे। “अहिले एकता नहुँदैमा सिद्धियो भन्ने होइन। मिल्ने नै हो,” उनले समर्थकहरूलाई भने।
रवि–बालेनबीच सहमति हुनुअघि उनीहरूसँगै छलफलमा रहेका कुलमान अन्तिम चरणमा अलग्गिएपछि राजनीतिक वृत्तमा चासो बढेको छ। सहमति सार्वजनिक भएपछि कुलमान भने उज्यालो नेपाल पार्टीको संगठन विस्तारमा सक्रिय देखिएका छन्। पोखरामा आयोजित भेलामा उनले कास्की जिल्लाको संयोजकको जिम्मेवारी युवा नेता क्षितिज बराललाई दिएका छन्।
कुलमानले नयाँ र वैकल्पिक शक्तिहरू एक ठाउँमा आउनुपर्ने धारणा दोहोर्याउँदै सहकार्यका ढोका बन्द नभएको बताए। “सम्मानजनक हैसियत, आत्मसम्मान र स्वाभिमान कायम रहने गरी सहकार्य हुनुपर्छ,” उनले भने, “छलफल त भइरहेकै छ, परिणाम पनि आउनेछ।”
उनले रवि–बालेनबीच भएको सहमतिलाई स्वागत गर्दै त्यसका लागि बधाईसमेत दिए। “उहाँहरूले सभापति र प्रधानमन्त्रीको विषयमा सहमति गर्नुभएको छ, त्यसका लागि बधाई दिनुपर्छ,” उनले भने, “अरू विषयमा पनि छलफल हुँदै जान्छ।”
रवि–बालेन–कुलमान तीनै जना एक ठाउँमा आउनुपर्ने चाहना समर्थक तहमा बलियो देखिएको छ। धेरैले नयाँ शक्तिहरू विभाजित हुँदा पुराना शक्तिलाई फाइदा पुग्ने भन्दै एकतामा जोड दिएका छन्। तर शक्ति बाँडफाँड, नेतृत्व र भूमिकाबारे सहमति नजुट्दा तत्काल एकता सम्भव नभएको बुझाइ छ।
कुलमानले भने उज्यालो नेपाल पार्टीलाई देशव्यापी रूपमा विस्तार गर्ने काम जारी रहने बताए। ‘उज्यालो नेपाल’ अभियान लामो समयदेखि चलिरहेको र अहिले पार्टीको रूपमा स्थापित भइसकेको उल्लेख गर्दै उनले जनसमर्थन बढ्दै गएको दाबी गरे।
“मानिसले बत्ती बाल्नेबित्तिकै उज्यालो सम्झिन्छन्,” उनले भने, “त्यस्तै गरी उज्यालो नेपाल पनि घरघरमा पुग्दैछ।”
रवि–बालेन सहमतिपछि पनि राजनीतिक समिकरण अन्तिम नभएको संकेत दिँदै कुलमानले नयाँ शक्तिहरू अन्ततः एउटै मोर्चामा आउने विश्वास व्यक्त गरेका छन्।
प्रकाशित मिति: आइतबार, पुस १३, २०८२
-1766845861.jpg)
