काठमाडौँ । उज्यालो नेपाल पार्टी र प्रगतिशील लोकतान्त्रिक पार्टीबीच एकता गर्ने विषयमा आन्तरिक गृहकार्य सुरु भएको छ। उज्यालो नेपालका संरक्षक कुलमान घिसिङ र प्रगतिशील लोकतान्त्रिक पार्टीका संरक्षक जनार्दन शर्माबीच निरन्तर संवाद भइरहेको बताइएको छ।
यसअघि राष्ट्रिय स्वतन्त्र पार्टीका सभापति रवि लामिछाने र काठमाडौँ महानगरपालिकाका मेयर बालेन्द्र साह (बालेन) बीच एकता गर्ने सहमति भएपछि घिसिङ त्यस प्रक्रियाबाट बाहिरिएका थिए। त्यसपछि उनले वैकल्पिक राजनीतिक सहकार्यका लागि प्रगतिशील लोकतान्त्रिक पार्टीसँग छलफल अघि बढाएका हुन्।
प्रगतिशील पार्टीका अध्यक्ष परिषद् सदस्य सन्तोष परियारका अनुसार दुवै दलबीच प्रारम्भिक छलफल जारी छ। “अहिले पनि संवादमै छौँ, अन्तिम निष्कर्षमा पुगिसकेका छैनौँ,” उनले बताए।
त्यसैगरी, अध्यक्ष परिषद्का अर्का सदस्य सुदन किरातीले रवि–बालेनबीच सहमति भएपछि कुलमान घिसिङलाई अलग राखिएको अवस्थामा प्रगतिशील र उज्यालोबीच सहकार्यको सम्भावना खुलेको बताए। “विचारको हिसाबले हामी नजिक छौँ, त्यसैले एकताको तयारी भइरहेको छ,” उनले भने।
प्रगतिशील लोकतान्त्रिक पार्टीका संरक्षकमा पूर्वमन्त्री जनार्दन शर्मासँगै डा. बाबुराम भट्टराई छन् भने उज्यालो नेपाल पार्टीको संरक्षकको भूमिकामा कुलमान घिसिङ रहेका छन्।
प्रकाशित मिति: आइतबार, पुस १३, २०८२
