काठमार्डौ । सङ्घीय संसद् भवन अगाडि प्रदर्शनरत जेनजी आन्दोलनकारीहरू आइतबार बिहानै प्रहरीको घेरा तोड्दै भवनभित्र प्रवेश गरेका छन्। माइतीघर मण्डलाबाट जुलुससहित बानेश्वरतर्फ अघि बढेका उनीहरूले संसद् भवनको गेटमा पुगेपछि प्रहरी अवरोध सामना गर्नुपरेको थियो।
सुरुवाती चरणमा प्रहरीले जलतोप, लाठीचार्ज र घेरा हालेर रोक्ने प्रयास गरे पनि आन्दोलनकारीहरू गेट चढेर भवन परिसरभित्र छिरेका छन्।
अश्रुग्यास प्रहार
उग्र बन्दै गएको स्थितिलाई नियन्त्रणमा लिन प्रहरीले संसद् भवन वरिपरि पटक–पटक अश्रुग्यास प्रहार गरेको छ। प्रहरी स्रोतका अनुसार दर्जनौँ आन्दोलनकारीलाई नियन्त्रणमा लिइएको छ भने केही घाइतेलाई उपचारका लागि नजिकैका अस्पताल पठाइएको छ।
जेनजीको माग
आन्दोलनरत युवाहरूले “राजनीतिक दलको असफल नेतृत्व र पुरानो पुस्ताको वर्चस्व अन्त्य गरी नयाँ पुस्तालाई मार्ग प्रशस्त गरिनुपर्छ” भन्ने मुख्य नारा अघि सारेका छन्। उनीहरूले भ्रष्टाचार नियन्त्रण, शिक्षा–रोजगारमा समान अवसर, र राज्यका निर्णय प्रक्रियामा युवाको प्रत्यक्ष सहभागिता सुनिश्चित गर्न माग गरेका छन्।
प्रहरी र आन्दोलनकारीबीच झडप
संसद् भवन अगाडिको मुख्य गेटमा प्रहरीले घेराबन्दी गर्दै आन्दोलनकारीलाई धपाउने प्रयास गर्दा झडप भएको हो। केही प्रहरी समेत घाइते भएको अनुमान गरिएको छ।
संसद् वरिपरि त्रसित माहोल
घटनापछि संसद् भवन वरिपरि सुरक्षा व्यवस्था कडा पारिएको छ। अतिरिक्त प्रहरी बल तैनाथ गरिएको छ। सडक आवागमन आंशिक रूपमा अवरुद्ध छ भने वरपरका व्यापारी तथा स्थानीयवासी त्रसित भएका छन्।
सरकारले भने परिस्थितिलाई नियन्त्रणमा लिने र आन्दोलनकारीहरूसँग वार्ता गर्ने तयारी भइरहेको जनाएको छ।
प्रकाशित मिति: सोमबार, भदौ २३, २०८२
-1757331170.jpg)
