काठमाडौ । नेपाल प्रहरीका नव नियुक्त महानिरीक्षक (आईजीपी) चन्द्रकुवेर खापुङले बिहीबार दर्ज्यानी चिह्न ग्रहण गरेका छन्।
गृह मन्त्रालयमा आयोजित विशेष समारोहमा गृहसचिव गोकर्णमणि दुवाडीले खापुङलाई दर्ज्यानी चिह्न लगाइदिएका हुन्। दर्ज्यानी चिह्न ग्रहण गरेसँगै उनले आजै प्रहरी प्रधान कार्यालय, नक्साल पुगेर कार्यभार सम्हाल्ने तयारी गरेका छन्।
सरकारले भदौ १३ गते बसेको मन्त्रिपरिषद् बैठकमार्फत खापुङलाई नेपाल प्रहरीको ३२औँ महानिरीक्षकमा नियुक्त गरेको थियो। त्यतिबेला वरिष्ठतम एआईजीका रूपमा उनी सूचीको पहिलो वरीयतामा परेका थिए।
यसअघि महानिरीक्षक रहेका दीपक थापा बुधबारदेखि अनिवार्य अवकाशमा गएका छन्। ३० वर्षे सेवा अवधि कायम रहेकाले नयाँ आईजीपी खापुङ करिब अढाई महिनापछि अवकाश हुनेछन्।
प्रकाशित मिति: बिहीबार, भदौ १९, २०८२
