काठमाडौं । नेपाली कांग्रेसका महामन्त्री गगन थापाले नेपालमा पपुलिजम र अराजकतावादी सोचको प्रभाव बढ्दै गएको भन्दै यसप्रति सचेत रहन सबैलाई आह्वान गरेका छन्।
हाल जारी विशेष महाधिवेशनमा प्रस्तुत राजनीतिक प्रतिवेदनमार्फत थापाले विश्वव्यापी रूपमा देखिएको पपुलिजम र अराजकतावादको असर नेपालमा पनि देखिन थालेको उल्लेख गरेका छन्। उनका अनुसार केही प्रवृत्ति र पात्रहरूले लोकतान्त्रिक प्रणाली, उदारवाद तथा बहुलवादी मूल्य–मान्यतालाई कमजोर पार्ने प्रयास गरिरहेका छन्।
प्रतिवेदनमा भनिएको छ, “लोकतन्त्र संस्थागत सुदृढीकरणबाट बलियो हुन्छ, चमत्कारबाट होइन भन्ने सत्यलाई छायामा पारेर भ्रम फैलाउने प्रयास भइरहेको छ।” यस्ता प्रवृत्तिहरूलाई रोक्दै उदार, समावेशी लोकतन्त्र र बहुलवादी समाजको संरक्षण तथा प्रवर्द्धन गर्नु नेपाली कांग्रेसको ऐतिहासिक जिम्मेवारी भएको पनि प्रतिवेदनमा उल्लेख छ।
थापाले लोकतन्त्रलाई केवल शासन प्रणालीको रूपमा होइन, जीवन पद्धतिको रूपमा बुझ्नुपर्ने धारणा राखेका छन्। उनका अनुसार लोकतान्त्रिक प्रणाली सफल हुन सरकार र राजनीतिक दलहरू जनताप्रति उत्तरदायी हुनुपर्छ र लोकतान्त्रिक संस्थाहरू सक्षम, सबल तथा प्रभावकारी हुन आवश्यक छ।
“संस्था बलियो भए पद्धतिको विकास हुन्छ र पद्धतिको विकासबाट मात्रै प्रणाली मजबुत बन्छ,” प्रतिवेदनमा भनिएको छ, “लोकतन्त्र विधिसम्मत, प्रक्रियामुखी र संस्था–प्रधान व्यवस्था हो।”
नयाँ राजनीतिक शक्तिका रूपमा उदाएका राष्ट्रिय स्वतन्त्र पार्टीका सभापति रवि लामिछाने र काठमाडौं महानगरपालिकाका मेयर बालेन शाहतर्फ संकेत गर्दै थापाले पपुलिस्ट र अराजकतावादी प्रवृत्तिहरूबाट सचेत रहँदै लोकतन्त्र र संविधानको रक्षा गर्न सम्पूर्ण नेपाली जनतालाई आग्रह गरेका छन्।
प्रकाशित मिति: सोमबार, पुस २८, २०८२
