काठमाडौं । नेपाली कांग्रेसका महामन्त्री गगन थापा आमाबुवासँग टीका लगाएर पार्टीको विशेष महाधिवेशनमा सहभागी हुन भृकुटीमण्डपतर्फ प्रस्थान गरेका छन्। आइतबार मध्याह्न आफ्नै निवासमा आमाबुवाबाट टीका र आशीर्वाद लिएर महाधिवेशनस्थलतर्फ लागेको जानकारी थापाले सामाजिक सञ्जालमार्फत सार्वजनिक गरेका हुन्।
थापाले आमाबुवासँगैको तस्बिर सामाजिक सञ्जालमा साझा गर्दै लेखेका छन्, ‘यहाँहरूको माया अनि आमाबुबाको आशीर्वाद लिएर आउँदै छु।’ उनकाे यो सन्देशलाई पार्टीभित्रको राजनीतिक संघर्षको संवेदनशील घडीमा भावनात्मक तथा सांकेतिक रूपमा हेरिएको छ।
महामन्त्री गगन थापा र महामन्त्री विश्वप्रकाश शर्माको आह्वानमा नेपाली कांग्रेसको विशेष महाधिवेशन आजदेखि काठमाडौँको भृकुटीमण्डपमा सुरु हुँदैछ। पार्टीभित्र देखिएको गम्भीर विवाद, संगठनात्मक असहमति र आगामी राजनीतिक कार्यदिशाका विषयमा छलफल गर्ने उद्देश्यसहित विशेष महाधिवेशन बोलाइएको हो।
तर, विशेष महाधिवेशनमा सभापति शेरबहादुर देउवा नेतृत्वको संस्थापन पक्षका अधिकांश नेता तथा कार्यकर्ता सहभागी नभएका छन्। संस्थापन पक्षको अनुपस्थितिलाई लिएर पार्टीभित्र थप ध्रुवीकरण बढ्ने संकेत देखिएको छ।
विशेष महाधिवेशनमा पार्टीको विधान, नेतृत्व चयन प्रक्रिया, संगठन सुदृढीकरण र आगामी निर्वाचन रणनीतिबारे छलफल हुने जनाइएको छ। गगन थापा पक्षधरले यस महाधिवेशनलाई कांग्रेसलाई ‘नयाँ दिशामा लैजाने निर्णायक मोड’का रूपमा चित्रण गरिरहेका छन्।
पार्टीभित्रको शक्ति सन्तुलन, भावी नेतृत्व र कांग्रेसको राजनीतिक भविष्यसँग जोडिएको यो विशेष महाधिवेशनलाई राष्ट्रिय राजनीतिले समेत चासोका साथ हेरिरहेको छ।
प्रकाशित मिति: आइतबार, पुस २७, २०८२
