काठमाडौं । नेपाली कांग्रेसका नेता मोहनबहादुर बस्नेतले महामन्त्री गगन थापालाई चुनावअघि नै भावी प्रधानमन्त्री घोषणा गर्नुपर्ने मागलाई असम्भव र अपरिपक्व प्रस्तावको संज्ञा दिएका छन् । पार्टी सभापति शेरबहादुर देउवाले यस्तो प्रस्ताव अस्वीकार गरेको जानकारी दिँदै बस्नेतले चुनाव जित्नै नसक्ने अवस्थामै प्रधानमन्त्री घोषणा गर्ने अभ्यास लोकतान्त्रिक र पार्टी विधानविपरीत हुने बताएका हुन् ।
बिहीबार पत्रकारहरूसँग कुरा गर्दै बस्नेतले गगन थापालाई ‘उधारो प्रधानमन्त्री’ घोषणा गर्नुपर्ने माग उठाइएकोप्रति कडा आलोचना गरे । उनले प्रधानमन्त्री बन्न पार्टीको विधानअनुसार संसदीय दलभित्र बहुमत कायम हुनुपर्ने र देशभरिका कार्यकर्ता तथा मतदाताको विश्वास जित्नुपर्ने स्पष्ट पारे ।
बस्नेतले भने,
‘प्रधानमन्त्री बन्न पार्टीभित्र बहुमत चाहिन्छ, जनताबाट अनुमोदन चाहिन्छ । कसैले चाह्यो भन्दैमा प्रधानमन्त्री घोषणा गरिन्छ ? चुनाव नै नजिती प्रधानमन्त्री ग्यारेन्टी खोज्नु हास्यास्पद हो ।’
उनले गगन थापाले कुन निर्वाचन क्षेत्रबाट चुनाव लड्ने भन्ने विषयसमेत अहिलेसम्म स्पष्ट नगरेको दाबी गरे ।
‘उहाँलाई कुन क्षेत्रबाट चुनाव लड्नुहुन्छ भनेर सोध्दा जवाफ दिन सक्नुहुन्न,’ बस्नेतले भने, ‘यस्तो अवस्थामा प्रधानमन्त्री घोषणा गर्नुपर्ने माग कसरी जायज हुन्छ ?’
बस्नेतले ‘उधारो प्रधानमन्त्री’को अवधारणालाई नै अस्वीकार्य भन्दै प्रश्न उठाए—
‘जसलाई प्रधानमन्त्री बनाउने भनियो, उही व्यक्ति चुनाव हारे भने के गर्ने ? यति परिपक्व भनिएका नेताबाट यति हल्का र हावादारी कुरा सुहाउँदैन ।’
उनका अनुसार सभापति देउवाले पनि यस्तो प्रस्तावप्रति स्पष्ट रूपमा असहमति जनाउँदै ‘पहिले चुनाव जित्नुपर्छ’ भन्ने अडान राखेका छन् ।
पार्टीभित्र देखिएको विवादका बाबजुद एकताको प्रयास अन्तिम समयसम्म जारी राखिएको बस्नेतले बताए ।
‘नोमिनेसन दर्ता भइसकेको अवस्था आए पनि अझै केही सहमति हुन सक्छ कि भनेर संस्थापन पक्ष अन्तिम घडीसम्म लागिरहेको छ,’ उनले भने, ‘तर नौटंकी शैली र दबाबको राजनीतिले पार्टी चल्दैन ।’
बस्नेतले पार्टी नेतृत्वका लागि परिपक्वता, अनुभव र सांगठनिक क्षमता अनिवार्य हुने उल्लेख गर्दै केही नेताहरू सभापति बन्न योग्य नरहेको टिप्पणी गरे ।
‘मैले मात्र होइन, विजयकुमार पाण्डेदेखि सुरेन्द्र केसीसम्मले यस्तो काँचो प्रवृत्तिको व्यक्ति सभापति हुन सक्दैन भनेर स्पष्ट भनिसक्नुभएको छ,’ उनले जोड दिए ।
नेपाली कांग्रेसभित्र नेतृत्व चयन र भावी रणनीतिलाई लिएर विवाद चर्किरहेका बेला बस्नेतको यो अभिव्यक्तिले आन्तरिक शक्ति संघर्षलाई अझ स्पष्ट बनाएको छ ।
प्रकाशित मिति: बुधबार, माघ १, २०८२
