काठमाडौं: विद्यालय स्तरसम्म खेलकुदमा सहभागी हुनु स्वीकार्य भए पनि क्षमता हुँदाहुँदै सामाजिक परिबन्ध र लोकलाजले खेलकुद र अन्य सीप विकासका गतिविधिमा सहभागी हुन वञ्चित गरिन्छ ।
सामाजिक कारणले नै क्षमता एवं प्रतिभा दबाउन बाध्य हुन्छन् छोरीहरू तर यी परिबन्ध र सामाजिक बहसलाई विराम लगाउने प्रयत्न गरेका छन्, प्रदेश २ को लक्ष्मीनियाँ गाउँपालिका–७, कुम्हरौडाका दिदीबहिनी शिषा र रक्षा झाले ।
उनीहरू बुवा इन्द्रकुमार झाको तीन छोरीमध्ये माहिली र कान्छी हुन् । दुवै दिदीबहिनी राष्ट्रिय कबड्डी टोलीको प्रतिनिधित्व गरी अन्तर्राष्ट्रिय खेलहरूमा समेत सहभागी भएका छन् ।
शिषाले कबड्डी टोलीको प्रतिनिधित्व गरी भारतको गुवाहाटीमा भएको बाह्रौँ साफ च्याम्पियनसिपमा सहभागिता जनाइन् । प्रतियोगितामा नेपालले तेस्रो स्थानमा चित्त बुझाउँदा शिषाको प्रदर्शन पनि शीर्ष पाँचभित्रै रहेको राष्ट्रिय टोलीका प्रशिक्षक तारासिंह भाट बताए । आजकाे गोरखापत्रमा समाचार छ ।
प्रकाशित मिति: बिहीबार, असोज १६, २०७६ ०१:११
