काठमाडौं : भूमि व्यवस्था, सहकारी तथा गरिबी निवारण मन्त्री पद्माकुमारी अर्यालको पहलमा साझा प्रकाशनका तत्कालीन महाप्रबन्धक डोलिन्द्रप्रसाद शर्मासँग स्पष्टीकरण माग गरिएको छ । साझा प्रकाशन सहकारी संस्थाले बुधवार पत्राचार गरी तीन दिनभित्र सञ्चालक समिति समक्ष स्पष्टीकरण पेश गर्न भनिएको छ ।
संस्थाका अध्यक्ष रघुराम विष्टद्वारा जारी गरिएको पत्रमा तत्कालीन प्रबन्धक शर्मालाई साझा प्रकाशन नियमावली, २०७३ (संशोधन सहित) को नियम ३०.१ को खण्ड (ख) बमोजिम आचरण तथा अनुशरण सम्बन्धी नियम उल्लंघन गरेको र सोही नियमावलीको खण्ड च बमोजिम आफ्नो पदको जिम्मेवारी बेवास्ता गरेको देखिएको भन्दै पत्र प्राप्त भएको मितिले तीन दिनभित्र सञ्चालक समितिसमक्ष स्पष्टीकरण पेश गर्न भनिएको छ । सञ्चालक समितिको फागुन २८ गतेको निर्णयअनुसार स्पष्टीकरण सोधिएको हो ।
प्रकाशनमा देखिएको बेथिति रोक्न मन्त्री अर्यालले एक्सन लिएकी हुन् । अर्यालले साझा प्रकाशनका तत्कालीन महाप्रबन्धक शर्मालाई मन्त्रालय तानेर मन्त्रालयका उपसचिव ऋषिराम पंगेनीलाई साझाको महाप्रबन्धक तोकेकी थिइन् । साझा प्रकाशनमा धरासायी भएर भ्रष्टाचार भइरहेको लगायतका थुप्रै बेथितिका कुरा बारम्बार बाहिरिएका थिए । यस सम्बन्धमा मन्त्री अर्यालले आन्तरिक टिम बनाएर अध्ययन गरेकी थिइन् ।
अध्यननका क्रममा तत्कालीन प्रबन्धकका थुप्रै समस्या देखिएपछि मन्त्री अर्यालले शर्मालाई मन्त्रालय तानेर छानबिन सुुरु गरेकी हुन् । आफ्नै छापाखाना, देशभर जग्गाजमिन भएको सम्पन्न संस्थाको रूपमा परिचित साझा प्रकाशन धराशायी भएको, साझाका कर्मचारीहरू एक वर्षदेखि आन्दोलनरत रहेको, कर्मचारीले तलब समेत खान नपाएको, कर्मचारी र नेतृत्वबीच राम्रो सम्बन्ध नभएको, सञ्चालक समिति र कर्मचारीबीचमा सम्बन्ध बिग्रिएको लगायतका थुप्रै समस्या रहेको बताइएको छ ।
कर्मचारीहरूले तलब समेत खान नपाएपछि मन्त्री अर्यालको विशेष पहलमा अर्थ मन्त्रालयबाट आठ करोड ऋण ल्याएर साझा प्रकाशनका कर्मचारीहरूलाई तलब खुवाउनुपरेको थियो । गएको फागुन १९ गते शर्मालाई मन्त्रालय तानेर मन्त्रालयका उपसचिव ऋषिराम पंगेनीलाई साझाको महाप्रबन्धक तोकिएको हो ।
राष्ट्रिय इतिहास बोकेको सरकारी संस्था साझा प्रकाशनलाई उचित रूपमा सञ्चालन नगरेको, प्रकाशन धरासायी बनाएको लगायतका थुप्रै बिषयहरू तत्कालीन महाप्रबन्धक शर्मामाथि लागेका छन् ।
प्रकाशित मिति: बिहीबार, फागुन ३०, २०७५
-1732776560.jpg)
