काठमाडौं : संसदीय सुनुवाई समितिले चारवटा संवैधानिक आयोगका अध्यक्षको नाम अनुमोदन गरेको छ । संघीय संरचना अनुसार संवैधानिक परिषद्को वैठकले गत माघ ६ मा पाँचवटा नयाँ आयोगमा अध्यक्ष नियुक्तिका लागि सिफारिस गरेको थियो । संविधान अनुसार बन्नुपर्ने राष्ट्रिय प्राकृतिक स्रोत तथा वित्त आयोग, राष्ट्रिय समावेशी, मधेशी, थारू आयोगका लागि अध्यक्षमा सिफारिस भएकाहरुलाई मंगलबार अनुमोदन गरिएको हो ।
राष्ट्रिय प्राकृतिक स्रोत तथा वित्त आयोगको अध्यक्षमा बालानन्द पौडेललाई अनुमोदन गरिएको छ । पर्वतमा जन्मेका पूर्व सचिव रहेका विज्ञ पौडेल स्थानीय पुनसंरचना आयोगका अध्यक्ष भएर काम गरिसकेका छन् ।
राष्ट्रिय समावेशी आयोगमा शान्तराज सुवेदीलाई अध्यक्षमा अनुमोदन गरिएको छ । प्युठानमा जन्मेका सुवेदी नेकपा माओवादी नेतृत्वको सरकारका पालामा अर्थसचिव भएका थिए ।
त्यसैगरी मधेशी आयोगको अध्यक्षमा धनुषाका विजयकुमार दत्तको नाम अनुमादन गरिएको छ । दत्त त्रिभुवन विश्वविद्यालय आंगिक क्याम्पस जनकहजारी विद्यापिठ जनकपुरका सहप्राध्यापक हुन् ।
थारु आयोगका अध्यक्ष विष्णुप्रसाद चौधरी अध्यक्षमा अनुमोदन भएका छन् । बर्दियामा जन्मेका चौधरी पूर्व आपूर्ति राज्यमन्त्री हुन् । मुश्लिम आयोगका लागि सिफारिस भएका अध्यक्ष समीम अन्सारीको नागरिकता, शैक्षिक प्रमाणपत्र विवादका कारण उनी रोकिएका छन् । उनको छानबिनको क्रम जारी रहेकाले अध्यक्षमा अनुमोदन गरिएको छैन ।
प्रधानमन्त्री केपी शर्मा ओलीको अध्यक्षतामा बसेको संवैधानिक परिषदको वैठकले पाँचवटा आयोगका लागि अध्यक्ष नियुक्तिको सिफारिस गरेको थियो । संवैधानिक परिषद्को सिफारिसमा संसदीय सुनुवाई समितिले अनुमोदन गरेपछि राष्ट्रपतिले नियुक्ति संवैधानिक व्यवस्था छ आयोगका पदाधिकारीको कार्यकाल छ वर्षको हुने व्यवस्था छ ।
प्रकाशित मिति: मंगलबार, फागुन २१, २०७५
-1732776560.jpg)
