कञ्चनपुर : साढे तीन महिनादेखि अनिश्चितकालीन धर्नामा बस्दै आएका निर्मला पन्तका बुवाआमाले धर्ना स्थगित गरेका छन् ।
कात्तिक अन्तिम हप्तादेखि आफ्नी छोरीको हत्यारा सार्वजनिक गर्न माग गर्दै अनिश्चितकालीन धर्नामा बस्दै आएका निर्मलाका आमबुबाले शुक्रबारदेखि धर्ना स्थगित गरेका हुन् । स्वास्थ्यमा समस्या देखिएपछि उपचारका लागि काठमाण्डौ जाने भएकाले धर्नाको कार्यक्रमलाई स्थगित गरिएको निर्मलाका बुवा यज्ञराज पन्तले बताए–‘धर्नालाई स्थगित गरे पनि आन्दोलनका अन्य कार्यक्रम भने जारी रहन्छ ।’
यसअघि दुईपटक बिरामी परेर त्रिवि शिक्षण अस्पताल काठमाडौंमा उपचार गराएर फर्किनु भएका यज्ञराज र उनकी श्रीमती लक्ष्मीदेवी पन्तको स्वास्थ्यमा खराबी आउन थालेपछि धर्ना स्थगित गर्नु परेको नागरिक संघर्ष समितिले जनाएको छ ।
प्रकाशित मिति: शुक्रबार, फागुन १०, २०७५
-1732776560.jpg)
