काठमाडौं । तनहुँ हाइड्रोपावर लिमिटेडले इटालियन ठेकेदार कम्पनी सीएमसीसँग ठेक्का सम्झौता रद्ध गर्ने भएको छ ।
तनहुँ हाइड्रोपावर साइटमा काम सुरु गर्नका लागि दिएको २८ दिनको समयभित्र काम सुरु नगरेपछि ठेक्का रद्ध गर्ने प्रक्रिया अघि बढाएको हो । गत महिना मेलम्चीबाट काम छाडेर हिँडेको सीएमसी नफर्किदा मेलम्चीको काम समेत रोकिएको छ ।
सीएमसीसँग सम्झौता तोड्ने प्रक्रिया अघि बढेको भन्दै छिट्टै कम्पनीलाई टर्मिनेशन लेटर दिने प्रबन्ध सञ्चालक प्रदीपकुमार थिकेले बताए ।
सीएमसीसँग ठेक्का प्रक्रिया रद्ध भएलगत्तै नयाँ ठेक्काका लागि टेन्डर आव्हान गरिनेछ । सीएमसीलाई बिदाई गरी नयाँ टेन्डर गर्नेबारे एसियाली विकास बैंक (एडीबी) सँग कुराकानी भइरहेको उनको भनाई छ ।
सीएमसीले ठेक्का सम्झौता गर्ता १ अर्ब ९७ करोड धरौटी राखेको छ । १४० मेगावाट क्षमताको तनहुँ जलविद्युत आयोजनाको नदी फर्काउने, बाँध निर्माण गर्ने लगायतका काम गर्नका लागि सीएमसीलाई छनोट गरिएको थियो ।
प्रकाशित मिति: आइतबार, फागुन ५, २०७५
