क्याम्प नोउमा शनिबार रोनाल्डोसँगै बार्सीलोना समर्थकहरुका पुराना याद फर्कनेछन् । ब्राजिली स्टार रोनाल्डो अहिले रियल भाल्लाडोलिडका प्रमुख लगानीकर्ता हुन् । शनिबार बार्सीलोनाले घरेलु मैदानमा भाल्लाडोलिसँग प्रतिस्पर्धा गर्दैछ ।
२० वर्षको छँदा सन् १९९६ मा रोनाल्डो बार्सीलोना आएका थिए । उनी डच क्लब पिएसभी इन्डहोभिनबाट सरुवा भएका थिए । क्लबमा रहँदा उनले ४९ खेल खेलेर ४७ गोल गरे । त्यसपछि अर्को सिजन उनी इन्टर मिलानमा सरुवा भए । तर, छोटो समयमै समर्थकहरुको मन जित्न सफल भएका थिए ।
क्लब छाडेको ६ वर्षपछि उनी फेरि फर्किएका थिए, तर चिरप्रतिद्वन्द्वी रियल म्याड्रिडको जर्सीमा । उनले गोल पनि गरेका थिए ।
अब भने उनी विलकुल फरक प्रोफाइलमा फर्कन लागेका छन् । रोनाल्डोले भाल्लाडोलिडको ५१ प्रतिशत स्वामित्व लिन ३० मिलियन युरो लगानी गरेका छन् ।
यस क्लबको पहिलो लक्ष्य ला–लिगामा टिकिराख्नु हो । तर रोनाल्डो कुनै समयका विजेता खेलाडी हुन् । त्यसैले खास लक्ष्य भविष्यमा लिग जित्नु नै हो । ब्राजिलका प्रमुख स्ट्राइकर रोनाल्डो सन् १९९४, १९९८, २००२ र २००६ को विश्वकप टोलीमा थिए । ब्राजिलले ९४ को विश्वकप जित्दा टोलीमा परेर पनि उनले कुनै खेल खेलेनन् । तर २००२ को विश्वकपमा ब्राजिललाई उपाधि जिताउने क्रममा सर्वाधिक ८ गोल गरेका थिए । उनी तीनपटकका फिफा वर्ष खेलाडी समेत हुन् ।
प्रकाशित मिति: शनिबार, फागुन ४, २०७५
