काठमाडौं : प्रेस काउन्सिल नेपालले एक वर्षमा पत्रकार आचारसंंहिता उल्लंघनका ३९३ घटना भएको जनाएको छ ।
गत २०७४ फागुनदेखि २०७५ माघसम्म १४९ उजुरी र काउन्सिलको स्वअनुगमनमा पत्रकार आचारसंहितासम्बन्धी २४४ घटना उल्लंघन गरिएको फेलापारेको काउन्सिलका सूचना अधिकारी दीपक खनालले जानकारी दिए । उल्लंघन गरिएकामध्ये उजुरीमा छापा माध्यम ६७ र विद्युतीय माध्यम ८२ तथा फेलापारेका घटनामध्ये १३ छापा माध्यम र २३१ विद्युतीय माध्यम रहेका छन् । उल्लंघन गरिएका घटनामध्ये १९९ वटा फर्छ्यौट गरिएको उनले बताए ।
सूचना अधिकारी खनालका अनुसार काउन्सिलअन्तर्गतको छापा माध्यम र विद्युतीय माध्यम आचारसंहिता अनुगमन उपसमितिको बैठकले काउन्सिलको पटक पटकको मौखिक/लिखित आग्रहलाई अटेरी गर्ने १६ बढी आमसञ्चार माध्यमलाई अवज्ञाकारीको सूचीमा राखेको छ ।
तीमध्ये अन्नपूर्ण पोस्ट दैनिक, काठमाडौं टुडे अनलाइनसहित तीनवटाले आचारसंहिता पालनामा प्रतिबद्धता जनाउँदै अवज्ञाकारीको सूचीबाट हटाउन निवेदन दिएकाले उक्त सूचीबाट हटाइएको छ भने गोरखापत्र दैनिकले आचारसंहिता पालनामा प्रतिबद्धता जनाउँदै हालै पत्राचार गरेको छ । सूचना अधिकारी खनालले सम्बन्धित पक्षको खण्डन छाप्न निर्देशन दिने, क्षमायाचनासहित खण्डन प्रकाशन गर्न निर्देशन दिने, आचारसंहिता प्रतिकूल समाचार सम्प्रेषण नगर्न सचेत गराउँदै आचारसंहिता पालना गर्न निर्देशन दिने बताए ।
काउन्सिलले त्यस्ता सञ्चार माध्यमलाई वर्गीकरणका लागि प्राप्त हुने आचारसंहिताको अंक घटाउने, प्रेस पास निलम्नबका लागि सिफारिस गर्ने, लोक कल्याणकारी विज्ञापनवापतको रकम समय तोकी रोक्का राख्न सिफारिस गर्ने, दुवै पक्षलाई झिकाई मेलमिलाप गराउने र काउन्सिलको आदेश नमान्नेलाई अवज्ञाकारीको सूचीमा राख्ने गर्दै आएको छ ।
प्रकाशित मिति: शनिबार, फागुन ४, २०७५
