२८ फागुन, काठमाडौँ । अष्ट्रेलियाको प्रतिष्ठित यति फुटबल क्लबले हरेक वर्ष आयोजना गर्ने ९ ए साईड कँडेल कन्सल्टेन्सी कप राष्ट्रिय फुटबल प्रतियोगिता आजबाट मेलबर्नमा सुरू भएको छ । दुई दिनसम्म चल्ने प्रतियोगितामा अष्ट्रेलिया भरका १६ टिमले सहभागिता जनाएका छन । प्रतियोगितामा मेलबर्न ५, सिड्नी ५, डार्विन, पर्थ, एडिलेड, अल्बरी, तास्मानिया क्यानबेरा गरी १६ टिम उपाधिका लागि भिड्नेछन् । यस्तै ३५ वर्षमाथि उमेर समूहमा ८ टिमको सहभागिता रहने छ । आज लिगका खेलहरु भएका छन भने आइतबार फाईनल खेलहरु सञ्चालन हुनेछ ।
सात वर्षदेखि सञ्चालन भइरहेको प्रतियोगितामा अष्ट्रेलियाभरका उत्कृष्ट खेलाडीहरु सहभागी रहेको प्रतियोगिताको प्रयोजक कँडेल कन्सल्टेन्सीका निर्देशक राज कँडेलले जानकारी दिनुभयो । यति क्लबमा नेपालको राष्ट्रिय टोलीमा समेत खेलिसकेका खेलाडी पनि अनुबन्धित छन् । खेलका लागि जम्मा भएका सम्पूर्ण खेलाडीको खाने बस्ने व्यवस्था कँडेल कन्सल्टेन्सी र यति फुटबल क्लबले गरेको छ । आए भएको उद्घाटन खेलमा अष्ट्रेलियामा रहेका नेपालीहरुको उल्लेख्य सहभागिता रहेको थियो । उद्घाटनमा बालबालिकालाई लक्षित गरेर मनोरञ्जनात्मक र सूचनामुलक प्रस्तुतीहरु समेत पस्किएको निर्देशक कँडेलले बताउनुभयो ।
प्रकाशित मिति: शुक्रबार, फागुन २७, २०७३
