रुकुम पूर्व । पुष्पकमल दाहाल ‘प्रचण्ड’ ले प्रतिनिधि सभा निर्वाचनमा हिंसा, आगजनी, भ्रष्टाचार र कुशासनसँग जोडिएका शक्तिहरूलाई जनताले मतमार्फत परास्त गर्ने दाबी गरेका छन्।
रुकुम पूर्वको चुनबाङमा शनिबार आयोजित जनभेटघाट तथा अन्तरक्रिया कार्यक्रममा बोल्दै उनले हालै बङ्गलादेश मा सम्पन्न निर्वाचन परिणामको उदाहरण दिँदै अराजक गतिविधिबाट राजनीति सफल नहुने बताए।
उनका अनुसार राज्यका महत्वपूर्ण संरचनामाथि आक्रमण, निजी सम्पत्तिमा आगजनी र दमनको राजनीति दीर्घकालीन रूपमा टिक्न सक्दैन। “आगो लगाएर, ध्वंस मच्चाएर र त्रास फैलाएर चुनाव जितिन्छ भन्ने सोच गलत सावित भएको छ,” उनले भने, “गणतन्त्र, परिवर्तन र स्थायित्वको पक्षमा उभिने शक्तिहरू अन्ततः विजयी हुन्छन्।”
प्रचण्डले बङ्गलादेशको अनुभवबाट नेपालले पनि पाठ सिक्नुपर्ने उल्लेख गरे। “त्यहाँ आगजनी गर्नेहरू नै चुनाव जित्छन् भन्ने हल्ला चलाइएको थियो, तर परिणाम फरक आयो,” उनले भने, “सामाजिक सञ्जालमा ठूलो प्रभाव देखाउनेहरू पनि जनमतमा पछि परे। यहाँ पनि जनताले हल्ला र यथार्थ छुट्याएर हेरेका छन्।”
उनले रोल्पा–रुकुम क्षेत्रका जनताले हिंसा र दमनको राजनीति राम्ररी बुझेको दाबी गर्दै अब देशव्यापी रूपमा जनताले विवेकपूर्ण निर्णय गर्ने विश्वास व्यक्त गरे।
कार्यक्रममा उनले रुकुम पूर्वलाई विकासको नयाँ नमुना जिल्लाका रूपमा अघि बढाउने प्रतिबद्धता समेत दोहोर्याए। “भरतपुरमा लागू गरिएको विकास मोडेल सबैले देख्नुभएको छ,” उनले भने, “अब यहाँ पनि समावेशी विकास र समाजवादको नयाँ अभ्यास अघि सारिनेछ।”
प्रकाशित मिति: शनिबार, फागुन २, २०८२
