काठमाडौं । बंगलादेशको पछिल्लो संसदीय निर्वाचनमा पूर्वप्रधानमन्त्री खालिदा जिया नेतृत्वको राजनीतिक धार पुनः सशक्त रूपमा फर्किएको छ। अपदस्थ प्रधानमन्त्री शेख हसिना नेतृत्वको अवामी लिग लाई प्रतिबन्ध लगाएर सम्पन्न निर्वाचनमा बंगलादेश नेशनलिस्ट पार्टी (BNP) ले दुई तिहाइ बहुमतसहित ऐतिहासिक जित हासिल गरेको हो।
स्वर्गीय खालिदा जियाका छोरा तारिक रहमान को नेतृत्वमा रहेको बिएनपीले २० वर्षपछि सत्तामा बलियो कमब्याक गरेको हो। सन् २००६ मा शेख हसिनासँग पराजित भएपछि बिएनपी लामो समय सत्ताबाहिर रहँदै आएको थियो।
निर्वाचन आयोगका अनुसार २ सीटको अन्तिम परिणाम आउन बाँकी रहँदा बिएनपीले २०९ सीट जितेर दुई तिहाइ बहुमत सुनिश्चित गरेको छ। यसअघि प्रतिबन्धमा परेको जमात–ए–इस्लामी ले ६८ सीट जित्दै प्रमुख प्रतिपक्षी दलको स्थान बनाएको छ।
शेख हसिनाविरुद्धको विद्यार्थी आन्दोलनबाट उदाएको नेपाल सिटिजन पार्टी भने अपेक्षाकृत कमजोर देखिएको छ। नाहिद इस्लाम नेतृत्वको उक्त पार्टीले जम्मा ६ सीट मात्र जित्न सफल भयो। नाहिद इस्लाम स्वयं भने सांसदमा निर्वाचित भएका छन्। उक्त पार्टीले जमातसँग तालमेल गरेर चुनाव लडेको थियो।
निर्वाचनमा करिब ६० प्रतिशत मत खसेको आयोगले जनाएको छ। केही साना दलले ७ सीट र स्वतन्त्र उम्मेदवारले पनि ७ स्थानमा विजय हासिल गरेका छन्।
यसबीच जमात–ए–इस्लामीले मतगणनामा धाँधली भएको आरोप लगाउँदै असन्तुष्टि व्यक्त गरेको छ। राजनीतिक विश्लेषकहरूले भने बिएनपीको जितलाई स्वाभाविक जनमतको अभिव्यक्ति भएको टिप्पणी गरेका छन्। अब बंगलादेश पुनः सहज लोकतान्त्रिक प्रक्रियातर्फ अघि बढ्ने अपेक्षा गरिएको छ।
प्रकाशित मिति: शुक्रबार, फागुन १, २०८२
