काठमाडौं । ग्रेटर नेपाल राष्ट्रवादी मोर्चाले नेपाली भूमिमा भइरहेको चीनविरोधी गतिविधि तत्काल रोक्न सरकारसँग जोडदार माग गरेको छ। मोर्चाले त्रिभुवन अन्तर्राष्ट्रिय विमानस्थलमा जनवरी २९ मा पृथकतावादी धर्मगुरु रिम्पोछेको अवतरणलाई अनपेक्षित, अवाञ्छित र स्पष्ट रूपमा चीनविरोधी गतिविधि भनेको छ।
मोर्चाका अनुसार कथित ‘डोल्पो समाज’ नामक संस्थाले रिम्पोछेलाई १० दिन लामो प्रवचन कार्यक्रमका लागि आफूखुसी आमन्त्रण गरेको हो। तर एक हप्ता बितिसक्दा पनि जिल्ला प्रशासन कार्यालय, काठमाडौंले उक्त संस्थामाथि कुनै कारबाही नगर्नुले यसमा सरकारी समर्थन रहेको आशंका पैदा भएको मोर्चाको ठहर छ।
एक चीन नीति अवलम्बन गर्ने प्रतिबद्धता सार्वजनिक रूपमा जनाउँदै आएको नेपाल सरकारले तिब्बत स्वतन्त्रताको कट्टर पक्षधर रिम्पोछेलाई नेपाल प्रवेश गर्न सहमति दिनु सरासर चीनविरोधी खेमामा उभिनु भएको मोर्चाको आरोप छ। यसले ‘मुखमा रामराम, बगलीमा छुरा’ भन्ने उखान चरितार्थ गरेको विज्ञप्तिमा उल्लेख गरिएको छ।
मोर्चाले नेपाल सरकारको दोहोरो र दुईजिब्रे व्यवहारले नेपाल–चीन सम्बन्धमा अविश्वास र षड्यन्त्रको बादल मडारिएको चेतावनी दिएको छ। चीनले यसलाई मित्रघात र कृतघ्नताका रूपमा लिएको खण्डमा दुई देशबीचको सम्बन्धमा गम्भीर विचलन आउन सक्ने मोर्चाको दाबी छ।
नेपाल–चीन सम्बन्ध नेपालको सार्वभौम अस्तित्वसँग प्रत्यक्ष रूपमा जोडिएको उल्लेख गर्दै मोर्चाले यसप्रति सरकार उदासीन बने परिणाम भयावह हुन सक्ने चेतावनी दिएको छ।
घटनापछि बिग्रिएको दुई देशबीचको सम्बन्धलाई पुरानै लयमा फर्काउन ‘डोल्पो समाज’ नामक संस्थाको दर्ता खारेज गर्न, संस्थाका अध्यक्ष टासी फोन्चो गुरुङमाथि कडा कारबाही गर्न र रिम्पोछेलाई तत्काल नेपाल छाड्न आदेश दिई छिटो कार्यान्वयन गर्न मोर्चाले सरकारसँग माग गरेको छ।
विज्ञप्तिमा मोर्चाका अध्यक्ष फणीन्द्र नेपालले हस्ताक्षर गरेका छन्।
प्रकाशित मिति: बिहीबार, माघ २३, २०८२
