काठमाडौँ । जुम्लाबाट राष्ट्रिय स्वतन्त्र पार्टी (रास्वपा) की उम्मेदवार विनिता कठायतले आफ्ना चुनावी प्रतिस्पर्धी तथा राप्रपा प्रवक्ता ज्ञानेन्द्र शाहीमाथि भ्रामक प्रचार गरेर मत मागिरहेको आरोप लगाएकी छन्।
आइतबार आयोजित पत्रकार सम्मेलनमा कठायतले शाहीले ‘बालेन साह र रवि लामिछाने मेरा साथी हुन्’ भन्दै मतदातालाई भ्रममा पारेर भोट मागिरहेको बताइन्। उनले यस्तो प्रचार तत्काल बन्द गर्न चेतावनीसमेत दिइन्।
कठायतका अनुसार शाहीले आफू रवि लामिछाने र बालेन साहसँग नजिक रहेको दाबी गर्दै मतदातालाई प्रभावित पार्न खोजिरहेका छन्। “अब ठग्ने समय सकिएको छ। जनता सचेत भइसकेका छन्,” उनले भनिन्।
उनले शाहीलाई सार्वजनिक रूपमा झूट बोलेको स्वीकार गरी जनतासँग माफी माग्न सुझाव दिँदै भनिन्, “गलत प्रचार गरेर कोही पनि अगाडि बढ्न सक्दैन। यस्ता हर्कतमा अलिकति पनि लाजसरम हुँदैन?”
कठायतले शाहीमाथि संसदमा रहँदा कुनै पनि विधेयकमा संशोधन प्रस्ताव नगरेको आरोप पनि लगाइन्। “कर्णालीको विकासका लागि टेवा पुग्ने एउटा पनि कानुन निर्माणमा उहाँको योगदान छैन,” उनले भनिन्। केवल शीर्ष नेताहरूलाई गाली गरेर विकास सम्भव नहुने उनको तर्क थियो।
उनका अनुसार शाहीले रास्वपाबाटै चुनाव लड्ने प्रयास गरेका थिए। “जुम्ला आउनुभन्दा एक घन्टा अघिसम्म पनि रास्वपाबाट चुनाव चिन्ह लिएर सुर्खेतबाट लड्न लबिङ भइरहेको थियो,” कठायतले दाबी गरिन्। आफूले समेत शाहीलाई रास्वपामा ल्याउन प्रयास गरेको तर पार्टीले टिकट नदिएको उनले बताइन्।
“पार्टीले नमान्नु हाम्रो दोष होइन,” कठायतले भनिन्, “अब यहाँ आएर रवि र बालेनको नाम लिएर चुनाव जित्न खोज्नु उचित हुँदैन।”
प्रकाशित मिति: बिहीबार, माघ २३, २०८२
