काठमाडौं । नेपाली कांग्रेसका सभापति गगनकुमार थापाले पार्टीको आगामी १५औँ महाधिवेशनबाट पनि आफू नै सभापति बन्ने दाबी गरेका छन्।
सर्लाहीको बलरा नगरपालिकामा अगुवा कार्यकर्तासँगको भेटघाटमा बोल्दै उनले आफू विशेष महाधिवेशनमार्फत भर्खरै मात्र सभापति बनेको स्मरण गराए। नेतृत्वबाट भाग्ने प्रवृत्ति आफ्नो नभएको उल्लेख गर्दै उनले पार्टीको जिम्मेवारी निरन्तर वहन गर्ने बताए।
‘म भाग्ने मान्छे होइन। कांग्रेसको सभापति बल्ल बनेको छु। महाधिवेशन आउँदै छ, फेरि बन्नुछ,’ उनले भने, ‘त्यसपछि केही समय सक्रिय राजनीतिमा रहनेछु।’
थापाले आफूलाई मधेशको छोरा मानेर सर्लाही–४ पुगेको बताउँदै निर्वाचन क्षेत्रका विषयमा पनि धारणा राखे। उनका अनुसार काठमाडौं–४ का मतदाताले त्यहीँबाट चुनाव लड्न आग्रह गरिरहेका छन् भने सर्लाही–४ का मतदाताले पनि भविष्यमा त्यही माग गर्ने वातावरण बनाउने उनको जिकिर थियो।
प्रकाशित मिति: मंगलबार, माघ १४, २०८२
