काठमाडौँ । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले आगामी प्रतिनिधि सभा निर्वाचनमा आफ्नो पार्टीको जित सुनिश्चित हुने दाबी गरेका छन्।
गोरखा–२ बाट पूर्वप्रधानमन्त्री डा. बाबुराम भट्टराईले उम्मेदवारी फिर्ता लिएपछि नेपाली कम्युनिस्ट पार्टीका उम्मेदवार लेखनाथ न्यौपानेको जित लगभग निश्चित जस्तै भएको प्रचण्डले बताएका हुन्।
आइतबार सिंहदरबारमा सम्पन्न राष्ट्रिय सभा संसदीय दलको बैठकलाई सम्बोधन गर्दै उनले उम्मेदवारी फिर्ता र त्यसअघि भएका संवादले डा. भट्टराई र नेपाली कम्युनिस्ट पार्टीबीचको सम्बन्ध क्रमशः सुधारतर्फ जाने विश्वास व्यक्त गरे।
संयोजक प्रचण्डले जेनजी आन्दोलन र त्यसपछि विकसित घटनाक्रममा नेकपाले लिएको भूमिकाका कारण पार्टीको छवि राष्ट्रिय तथा अन्तर्राष्ट्रिय स्तरमा अन्य पुराना दलको तुलनामा सकारात्मक बनेको जिकिर गरे। जेनजी पुस्ताका युवाहरूले पनि तीन प्रमुख दलमध्ये नेपाली कम्युनिस्ट पार्टी र यसको नेतृत्व फरक रहेको अनुभूति गरेको उनको दाबी थियो।
त्यसैगरी, राष्ट्रिय स्वतन्त्र पार्टीप्रति देखिएको प्रारम्भिक उत्साह उनीहरूका उम्मेदवारहरूको गतिविधिका कारण क्रमशः कमजोर हुँदै गएको उनले बताए। उम्मेदवारहरूले प्रयोग गरेका सवारी साधन, उनीहरू कसको सहयोगमा अघि बढिरहेका छन् भन्ने तथ्य सार्वजनिक हुँदै जाँदा जनताले ती गतिविधिलाई गहिरो रूपमा मूल्याङ्कन गरिरहेको प्रचण्डको भनाइ थियो।
उनले यस्ता तथ्य बाहिरिँदै जाँदा रास्वपातर्फ गएको राजनीतिक माहोल विस्तारै कमजोर बन्दै गएको पनि उल्लेख गरे।
प्रकाशित मिति: आइतबार, माघ १२, २०८२
