काठमाडौँ । नेकपा एमालेका अध्यक्ष केपी शर्मा ओलीले मुलुकको वर्तमान राजनीतिक अवस्था असामान्य बन्दै गएको भन्दै अब पार्टीले आन्दोलनको बाटो रोज्ने कि निर्वाचन प्रक्रियामै सहभागी हुने भन्ने विषयमा अहिल्यै निष्कर्षमा पुग्न नसकिने बताएका छन्।
शनिबार पार्टी केन्द्रीय कार्यालय च्यासलमा आयोजित पार्टी प्रवेश कार्यक्रमलाई सम्बोधन गर्दै अध्यक्ष ओलीले सरकारको व्यवहारप्रति गम्भीर असन्तुष्टि व्यक्त गरे। उनले लोकतान्त्रिक मूल्य–मान्यता विपरीत सत्ताको दुरुपयोग भइरहेको आरोप लगाउँदै यस्तो अवस्थाले विपक्षी दललाई रणनीति पुनर्विचार गर्न बाध्य बनाएको बताए।
अध्यक्ष ओलीले हालै झापाबाट काठमाडौँ फर्किने क्रममा त्रिभुवन अन्तर्राष्ट्रिय विमानस्थलमा आफूलाई गरिएको व्यवहारलाई उदाहरणका रूपमा प्रस्तुत गरे। उनले राज्य संयन्त्रबाट भएको उक्त व्यवहारले आफूलाई अपमानित महसुस गराएको उल्लेख गरे।
‘मैले यस्तो व्यवहार त विदेश भ्रमणका क्रममा पनि भोगेको थिइनँ,’ ओलीले भने, ‘तर आफ्नै देशको विमानस्थलमा यस्तो अनुभूति हुनुले सभ्य समाजमै छौँ कि छैनौँ भन्ने प्रश्न उठेको छ।’
उनका अनुसार सरकारको यस्तो प्रवृत्तिले लोकतन्त्र कमजोर बनाउने मात्र नभई राजनीतिक अस्थिरतालाई झन् गहिरो बनाउने खतरा छ। ओलीले सरकार शक्ति केन्द्रित गर्ने र असहमत आवाज दबाउने दिशातर्फ अघि बढिरहेको आरोप लगाए।
कार्यक्रममा उनले एमाले कुनै पनि हालतमा लोकतन्त्र, संविधान र जनताको अधिकारको रक्षामा दृढतापूर्वक उभिने स्पष्ट पारे। आन्दोलन र निर्वाचन दुवै विकल्प खुला रहेको बताउँदै उनले परिस्थिति, सरकारको कदम र जनभावनाका आधारमा पार्टीले उपयुक्त निर्णय लिने संकेत गरे।
‘हामी हतारमा निर्णय गर्ने पक्षमा छैनौँ,’ उनले भने, ‘जनताको हित, लोकतन्त्रको रक्षा र राष्ट्रिय स्वाभिमानलाई केन्द्रमा राखेर एमालेले आफ्नो बाटो तय गर्नेछ।’
कार्यक्रममा विभिन्न दल परित्याग गरी एमाले प्रवेश गरेका नेताकार्यकर्तालाई स्वागत गर्दै ओलीले पार्टीलाई अझ बलियो र एकताबद्ध बनाएर लैजाने प्रतिबद्धता पनि व्यक्त गरे।
प्रकाशित मिति: शनिबार, माघ ११, २०८२
