काठमाडौं । नेकपा संयोजक पुष्पकमल दाहाल ‘प्रचण्ड’ले देश अझै गम्भीर संकटबाट पूर्ण रूपमा बाहिर ननिस्किएको भन्दै सम्भावित दुर्घटना टरिन बाँकी रहेको चेतावनी दिएका छन्। एमाले ओखलढुङ्गा कमिटीका नेताहरूलाई पार्टीमा स्वागत गर्दै उनले अरूको भरमा बस्ने समय सकिएको स्पष्ट पारे।
प्रचण्डका अनुसार बलियो राष्ट्रिय शक्ति निर्माण हुन नसके फेरि पनि देश अर्को संकटतर्फ धकेलिन सक्छ। ‘देशलाई फेरि खाल्टोमा पर्न नदिन हामीले जिम्मेवारी लिएका छौँ,’ उनले भने, ‘त्यसैले वामपन्थी, कम्युनिस्ट र राष्ट्रवादी शक्तिहरूलाई एकैठाउँमा ल्याउने पहल गरेका हौँ।’
उनले लाखौँ जनता पहिले नै नेकपामा समाहित भइसकेको दाबी गरे। साथै, जेन–जी पुस्ताले पनि आफ्ना एजेन्डा कार्यान्वयन गर्न सक्ने दलका रूपमा नेकपालाई बुझिसकेको बताए। एमालेभित्र रहेका देशभक्त र वामपन्थी शक्तिहरू पनि क्रमशः नेकपामा समाहित हुने वातावरण ओखलढुङ्गाबाट सुरु भइसकेको उनको भनाइ थियो।
प्रचण्डले एमाले नेतृत्वलाई कुनै भ्रममा नपरी राष्ट्र निर्माणको महाअभियानमा सहभागी हुन आह्वान गरे। साथै, लोकतन्त्रवादी शक्तिहरू पनि साझा मोर्चामा आउनुपर्ने आवश्यकता औँल्याए।
प्रकाशित मिति: शुक्रबार, माघ १०, २०८२
