काठमाडौं । निर्वाचन आयोगले निर्वाचन आचारसंहिता उल्लङ्घन गरेको आरोपमा काठमाडौं महानगरपालिकाका मेयर तथा रास्वपा वरिष्ठ नेता बालेन शाहसहित चार जना उम्मेदवारलाई २४ घण्टे स्पष्टीकरण सोधेको छ।
स्पष्टीकरण सोधिनेमा झापा–५ का उम्मेदवार बालेन शाह, भक्तपुर–२ का एमाले सचिव महेश बस्नेत, सुनसरी–१ का श्रम संस्कृति पार्टीका अध्यक्ष हर्क साम्पाङ र रुपन्देही–२ का उम्मेदवार निकोलस भुसाल रहेका छन्।
आयोगका अनुसार उनीहरूले निर्वाचन आचारसंहिता विपरीत गतिविधि गरेको भन्दै उजुरी परेपछि स्पष्टीकरण सोधिएको हो। बालेन शाहले झापा–५ का अर्का उम्मेदवार तथा एमाले अध्यक्ष केपी शर्मा ओलीविरुद्ध भदौ २३ गतेको घटनासँग जोडेर सामाजिक सञ्जालमा टिप्पणी गरेका थिए। सोही विषयलाई लिएर आयोगमा उजुरी दर्ता भएपछि कारबाही प्रक्रिया अघि बढाइएको जनाइएको छ।
निर्वाचन आयोगले तोकिएको समयभित्र स्पष्ट जवाफ पेश गर्न सम्बन्धित उम्मेदवारलाई निर्देशन दिएको छ।
प्रकाशित मिति: मंगलबार, माघ १४, २०८२
