काठमाडौं । नेपाली कांग्रेसका सभापति गगनकुमार थापा उम्मेदवार बनेपछि पहिलो पटक आज आफ्नो निर्वाचन क्षेत्र सर्लाही–४ जाँदै छन्। स्थानीय कार्यकर्ता, मतदाता र जनप्रतिनिधिसँग भेटघाट तथा अन्तरक्रियाका लागि उनी सर्लाही पुग्न लागेका हुन्।
थापाको सचिवालयका अनुसार उनी बिहान १०:३० बजे सिमराका लागि नियमित उडानमार्फत प्रस्थान गर्ने कार्यक्रम छ। सिमरा विमानस्थलमा अवतरणपछि उनी सडकमार्ग हुँदै सर्लाही पुग्नेछन्।
सर्लाहीमा रहँदा थापाले विभिन्न स्थानीय तहमा आयोजना हुने अन्तरक्रिया कार्यक्रममा सहभागिता जनाउनेछन्। भ्रमणका क्रममा उनले स्थानीय जनप्रतिनिधि तथा सर्वसाधारणका गुनासा सुन्ने, पार्टीको सांगठनिक गतिविधि सुदृढ गर्ने र निर्वाचनसम्बन्धी तयारीबारे छलफल गर्ने कार्यक्रम तय गरिएको सचिवालयले जनाएको छ।
‘निर्वाचन क्षेत्रका मतदातासँग प्रत्यक्ष संवाद गर्ने र पार्टी संगठनलाई सक्रिय बनाउने उद्देश्यले सर्लाही जान लाग्नु भएको हो,’ थापाको सचिवालयका एक सदस्यले बताए।
आगामी फागुन २१ गते हुने प्रतिनिधिसभा निर्वाचनका लागि थापा सर्लाही–४ बाट उम्मेदवार बनेका छन्। उनले माघ ६ गते वारेसमार्फत उम्मेदवारी दर्ता गराएका थिए। उम्मेदवारी दर्तापछि उनी पहिलो पटक चुनावी क्षेत्रमा जान लागेका हुन्। यसअघि कांग्रेस केन्द्रीय समिति बैठकले थापालाई भावी प्रधानमन्त्रीको उम्मेदवारका रूपमा समेत अघि सारेको छ।
प्रकाशित मिति: सोमबार, माघ १३, २०८२
