काठमाडौं । नेपाली कम्युनिस्ट पार्टी (नेकपा) का वरिष्ठ नेता झलनाथ खनालले हरिबोल गजुरेलसहितका नेताहरूमाथि गरिएको पार्टी कारबाहीप्रति कडा आपत्ति जनाएका छन्।
सोमबार सामाजिक सञ्जाल फेसबुकमार्फत् खनालले पार्टी संयोजक पुष्पकमल दाहाल ‘प्रचण्ड’ले गरेको कारबाहीप्रति असन्तुष्टि व्यक्त गर्दै यसलाई आश्चर्यजनक र असंवैधानिक शैलीको निर्णय भनेका छन्।
उनले वरिष्ठ नेताहरूलाई स्पष्टीकरण दिने अवसरसमेत नदिई पार्टीबाट निष्कासन गरिएको, पार्टीका विभिन्न घटकमा रहेका नेताहरूलाई संस्थागत रूपमा जानकारी नदिइएको र एकाएक सञ्चारमाध्यमबाट निर्णय सार्वजनिक गरिएकोप्रति गम्भीर प्रश्न उठाएका छन्।
खनालले यदि नेकपालाई सच्चा कम्युनिस्ट पार्टीका रूपमा अघि बढाउने हो भने तत्काल कारबाही स्थगित गर्नुपर्ने र हरिबोल गजुरेलसहित नेतृत्वदायी तहका नेताहरूको आकस्मिक बैठक बोलाइनुपर्ने माग गरेका छन्।
उनले पार्टीभित्र भएका पछिल्ला निर्णयहरूबारे गहिरो छलफल, आत्मसमीक्षा र सामूहिक नेतृत्व प्रणालीको अभ्यास अपरिहार्य रहेको उल्लेख गर्दै अधिनायवादी शैली त्याग्न संयोजक प्रचण्डसँग जोडदार आग्रह गरेका छन्।
पार्टीको निर्णयविपरीत सिन्धुली–२ बाट प्रतिनिधिसभा सदस्यका लागि महेश्वर दाहालले उम्मेदवारी दर्ता गरेपछि नेता हरिबोल गजुरेल र महेश्वर दाहाललाई पार्टीबाट निष्कासन गरिएको थियो।
प्रकाशित मिति: सोमबार, माघ १३, २०८२
