काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेसहित प्रतिवादी रहेको संगठित अपराध तथा सम्पत्ति शुद्धीकरणसम्बन्धी मुद्दा तत्काल फिर्ता लिन नपाइने भन्दै रुपन्देही जिल्ला अदालतले अनुमति दिन अस्वीकार गरेको छ।
महान्यायाधिवक्ता कार्यालयले ती अभियोग फिर्ता लिने निर्णय कार्यान्वयनका लागि दायर गरेको निवेदन अदालतले स्वीकार नगरेको हो। अदालतले सो विषय सर्वोच्च अदालतमा विचाराधीन रहेकाले त्यहाँको अन्तिम टुंगो नलागेसम्म मुद्दा फिर्ता प्रक्रिया अघि नबढ्ने स्पष्ट पारेको छ।
रुपन्देही जिल्ला अदालतका तहसिलदार कृष्णप्रसाद पौडेलका अनुसार, माघ ६ गते न्यायाधीश श्यामलाल घिमिरेको इजलासले सर्वोच्च अदालतमा परेको रिटको अन्तिम निर्णयपछि मात्र निवेदन पेश गर्नू भन्ने आदेश दिएको हो।
महान्यायाधिवक्ता कार्यालयले सहकारी ठगीसम्बन्धी मुद्दा यथावत् राख्दै संगठित अपराध र सम्पत्ति शुद्धीकरणसम्बन्धी अभियोग फिर्ता लिन जिल्ला सरकारी वकिल कार्यालयमार्फत अदालतमा निवेदन दिएको थियो। तर सर्वोच्च अदालतमा सोही विषयमा रिट विचाराधीन रहेकाले रुपन्देही जिल्ला अदालतले हाललाई प्रक्रिया रोकिदिएको हो।
प्रकाशित मिति: बिहीबार, माघ १६, २०८२
