काठमाडौं । उज्यालो नेपाल पार्टीका अध्यक्ष कुलमान घिसिङले सक्षम र इमानदार व्यक्ति नेतृत्वमा नपुगेसम्म देशले अपेक्षित प्रगति गर्न नसक्ने बताएका छन्।
मंगलबार काठमाडौंमा आयोजित पार्टीको रामेछाप–काठमाडौं सम्पर्क मञ्च गठन तथा कार्यकर्ता भेलालाई सम्बोधन गर्दै उनले ठूला–ठूला भाषण र नेताहरूको व्यक्तिगत दर्शनका कारण मात्र देश नबन्ने स्पष्ट पारे। देश निर्माणका लागि सही व्यक्ति नेतृत्वमा पुग्नैपर्ने उनको भनाइ थियो।
घिसिङले अघिल्लो निर्वाचनमा पुराना राजनीतिक दलले देखाएको विकृति र विसंगति अहिले ‘नयाँ’ भनिएका दलहरूले समेत दोहोर्याइरहेको देख्दा दुःख लागेको बताए। भ्रष्टाचारमुक्त देश र सुशासन स्थापनाका लागि पार्टीका उम्मेदवारले आफैंबाट सुशासनको अभ्यास गर्न सिक्नुपर्नेमा उनले जोड दिए।
देशका विभिन्न क्षेत्रमा गम्भीर समस्या रहेको उल्लेख गर्दै ती समस्याको समाधानमार्फत समृद्धितर्फ अघि बढ्न उज्यालो नेपाल पार्टी सक्षम रहेको दाबी उनले गरे। जनताले आफ्नो पार्टीलाई विश्वास गर्ने आधार तयार हुँदै गएको उनको भनाइ थियो।
कार्यक्रमका क्रममा विभिन्न दल परित्याग गरी आएका कार्यकर्तालाई घिसिङले उज्यालो नेपाल पार्टीमा स्वागत गरेका थिए।
प्रकाशित मिति: मंगलबार, माघ १४, २०८२
