काठमाडौं । नेपाल राष्ट्रिय राजनीतिक गुरुकुल र स्वदेशवादी अभियानले वर्तमान सरकारलाई “सत्ता अपहरणकारी जमात” को संज्ञा दिँदै त्यसको नेतृत्वमा गरिने कुनै पनि निर्वाचन मान्य नहुने घोषणा गरेका छन्।
संयुक्त रूपमा जारी प्रेस विज्ञप्तिमा दुवै संस्थाले मुलुकको समसामयिक राजनीतिक अवस्थाप्रति गम्भीर चिन्ता व्यक्त गर्दै विदेशी एजेन्डा अनुरूप सरकार निर्माण गर्ने प्रयास भइरहेको आरोप लगाएका छन्। उनीहरूले त्यस्तो सरकार नेपाली जनताको हितविपरीत हुने ठहर गर्दै स्वीकार गर्न नसकिने स्पष्ट पारेका छन्। विज्ञप्तिमा उल्लेख छ, “विदेशी एजेन्डामा निर्माण गरिने आगामी सरकार जनताको पक्षमा हुँदैन। त्यसैले हामी त्यस्तो सरकार स्वीकार गर्दैनौं।”
त्यस्तै, गत भदौ २४ गते भएको हत्या, हिंसा र आगजनीका घटनामा संलग्न योजनाकारहरूलाई कानुनी दायरामा नल्याई निर्वाचन गराउनु ‘जनतामाथिको धोका’ हुने उनीहरूको दाबी छ। दोषीमाथि कारबाही नगरी चुनाव गराउनु न्याय र विधिको शासनको खिल्ली उडाउनु भएको विज्ञप्तिमा उल्लेख गरिएको छ।
संस्थाहरूले पूर्व प्रधानन्यायाधीशको नेतृत्वमा निर्वाचन गराउने चर्चा प्रति पनि आपत्ति जनाएका छन्। वर्तमान संविधानले त्यस्तो व्यवस्था नचिनेको दाबी गर्दै उनीहरूले त्यस्तो नेतृत्वमा सम्पन्न हुने चुनाव अवैध हुने बताएका छन्।
वक्तव्यमा वर्तमान सरकारलाई “अपहरणकारी प्रवृत्तिको” भन्दै त्यसलाई निर्वाचन गराउने नैतिक तथा संवैधानिक अधिकार नरहेको जिकिर गरिएको छ। साथै, चुनावी परिणामले देशलाई अन्तर्राष्ट्रिय शक्ति केन्द्रहरूको खेलमैदान बनाउने खतरा रहेको भन्दै सचेत गराइएको छ।
अन्त्यमा, दुवै संस्थाले सर्वपक्षीय सहभागितामा स्वदेशवादी नागरिक सरकार गठन गरी न्यायपूर्ण, पारदर्शी र निष्पक्ष निर्वाचन गराउन माग गरेका छन्।
प्रकाशित मिति: बिहीबार, माघ ३०, २०८२
