काठमाडौं । नेपाल ओलम्पिक कमिटी (एनओसी) को तदर्थ समितिले जीवनराम श्रेष्ठ नेतृत्वको अवैध कमिटीलाई तीन दिनभित्र सम्पूर्ण चल–अचल सम्पत्ति बुझबुझारथ गर्न निर्देशन दिएको छ।
तदर्थ समितिको सचिवालय व्यवस्थापन उपसमितिका संयोजक निलेन्द्रराज श्रेष्ठले शनिबार जीवनरामको नाममा पत्र पठाउँदै नगद, जिन्सी सामग्री, माइनुट बुकसहित सम्पूर्ण सम्पत्ति तत्काल हस्तान्तरण गर्न आदेश दिएका हुन्।
यो पत्रको प्रतिलिपि राष्ट्रिय खेलकुद परिषद् (राखेप)का सदस्यसचिव टंकलाल घिसिङलाई पनि पठाइएको छ। राखेपले विधानविपरीत निर्वाचन र संशोधनमार्फत बनेको भन्दै जीवनराम नेतृत्वको कार्यसमिति पहिले नै खारेज गरिसकेको थियो।
पत्रमा भनिएको छ, “तपाईँको नेतृत्वमा गठन गरिएको भनिएको ओलम्पिक कमिटिको निर्वाचन र विधान संशोधन प्रक्रिया कानुनसम्मत नभएकाले उक्त कार्यसमिति अवैध ठहर भएको कुरा अवगत गराइन्छ।”
साउन २६ गते खेल संघहरूको संयुक्त भेलाबाट गठित तदर्थ समितिलाई नेपाल सरकार र राखेपले आधिकारिकता दिएको छ। भदौ ४ गतेदेखि समितिले कार्यभार सम्हालिसकेको जानकारी पनि दिइएको छ।
जीवनरामले तोकिएको समयभित्र सम्पत्ति बुझाएन भने कानुनअनुसार कारबाही हुने चेतावनी पत्रमा उल्लेख छ।
.jpeg)
प्रकाशित मिति: मंगलबार, भदौ १०, २०८२
