काठमाडौं । प्रिमियर लिगको रोमाञ्चक खेलमा लिभरपुलका १६ वर्षीय खेलाडी रियो न्गुमोहाँले अतिरिक्त समयमा निर्णायक गोल गर्दै टोलीलाई नायकजस्तो जित दिलाएका छन्।
न्यूकासलविरुद्ध सेन्ट जेम्स पार्कमा सोमबार राति भएको खेलमा पहिलो हाफमै एन्टोनी गोर्डन रातो कार्ड खाँदा घरेलु टोली १० खेलाडीमा झरेको थियो। त्यसबेला लिभरपुलले अग्रता लिइसकेको थियो। दोस्रो हाफ सुरु हुनासाथ ह्युगो एकिटिकेले गोल थपेपछि खेल लिभरपुलतर्फ ढल्किएको जस्तो देखिएको थियो।
तर न्यूकासलका ब्रुनो गुइमाराएसले हेडिङमार्फत ५७औं मिनेटमा गोल गर्दै घरेलु समर्थकलाई उत्साहित बनाए। अन्तिमतिर सब्स्टिच्युट विलियम ओसुलाले थप गोल गर्दा खेल बराबरीमा फर्किएको थियो।
खेल २–२ को अवस्थामा तानिएको थियो। थपिएको ११ मिनेटको अतिरिक्त समयमा भने प्रशिक्षक आर्ने स्लोटले ल्याएका परिवर्तन निर्णायक बने। लिगमा पहिलोपटक मैदान टेक्दै गरेका न्गुमोहाँले इन्जुरी टाइमको छैटौं मिनेटमा सजिलो अवसरलाई गोलमा परिणत गर्दै लिभरपुललाई ३–२ को जित दिलाए।
१६ वर्षीय न्गुमोहाँ प्रिमियर लिग इतिहासमा चौथो सबैभन्दा कम उमेरमा गोल गर्ने खेलाडी बनेका छन्। यसअघि यो सूचीमा जेम्स भोन, जेम्स मिल्नर र वेन रूनी मात्र थिए।
यो जितपछि लिभरपुलले सुरुआती दुई खेलमै पूर्ण अंक जोडेको छ। आर्सनल र टोटनह्याम पनि समान अवस्थामा छन्। न्यूकासल भने पहिलो दुई खेलमा एक अंकमै सीमित छ।
प्रकाशित मिति: मंगलबार, भदौ १०, २०८२
