काठमाडौं । मनाङ मस्र्याङ्दी क्लबले शहीद स्मारक ए डिभिजन लिग फुटबलमा लगातार छैटौं जित हात पारेको छ ।
सातदोबाटोस्थित एन्फा कम्प्लेक्समा भएको खेलमा मनाङले जावलाखेल युथ क्लबमाथि १–० को जित निकालेको हो ।
लिगमा निकै कमजोर मानिएको जावलाखेलमाथि मनाङले कठिन जित हात पारेको हो । मनाङको जितमा अञ्जन विष्टले पेनाल्टीमार्फत गरेको गोल निर्णायक बन्यो ।
पहिलो हाफमा गोलरहित बराबरी खेलेको मनाङले खेलको दोस्रो हाफमा गोल गर्न सफल भयो । खेलको ६२ औं मिनेटमा अफिज ओलावालेलाई डिबक्सभित्र फल गरेपछि मनाङले पेनाल्टी पाएको थियो ।
जितसँगै मनाङको ६ खेलबाट १८ अंक भएको छ । जावलाखेलले भने ६ खेलमध्ये एक खेलमा जित एक खेलमा बराबरीसहित चार अंक बटुलेको छ ।
प्रकाशित मिति: मंगलबार, मंसिर १८, २०७५
