पोखरा । पोखरामा पुष ४ देखि २० गतेसम्म जुनियर एटिएफ टेनिस च्याम्पियनसिप हुने भएको छ । एसियन टेनिस महासंघको कार्यक्रमअनुसार उक्त खेल सञ्चालन हुने भएको हो ।
प्रतियोगितामा अष्ट्रेलिया, इण्डोनेसिया, मलेसिया, हङकङ, पाकिस्तान, भारत र नेपालका १० देखिमाथि र १४ वर्षमुनिका १११ जना पुरुष तथा महिला खेलाडीको सहभागिता रहने आयोजक कास्की जिल्ला टेनिस संघले जनाएको छ ।
संघका महासचिव नवीन चालिसेका अनुसार प्रतियोगिताअन्तर्गत पहिलो सर्किटमा ३० पुरुष र २३ महिलासहित ५३ जना तथा दोस्रो सर्किटमा ३३ पुरुष र २५ महिलासहित ५८ खेलाडीले भाग लिने छन् ।
होटल ट्रेकर्स इनले मुख्य प्रायोजन गरेको प्रतियोगिता अङ्ग्रेजी नयाँ वर्षका समयमा हुने भएकाले यसले यहाँको पर्यटकीय विकासमा महत्वपूर्ण योगदान पुर्याउने विश्वास लिइएको छ ।
प्रकाशित मिति: आइतबार, कात्तिक १८, २०७५
