पोखरा । पोखरा प्रिमियर लिग (पीपीएल) क्रिकेटमा पारस खड्काको नेतृत्वमा रहेको चितवन राइनोजले पहिलो जित हासिल गरेको छ ।
बुधबार भएको पहिलो खेलमा चितवनले धनगढी ब्लुजलाई १ सय २६ रनले पराजित गर्यो । चितवनले दिएको १ सय ९४ रनको लक्ष्य पछ्याएको धनगढी १६.२ ओभरमा अलआउट हुँदै ६७ रनमा समेटियो ।
धनगढीलाई रोक्न स्पिनर सन्नी पटेलले ३.२ ओभरमा ८ रन खर्चेर ४ विकेट लिए । खराब सुरूवात गरेको धनगढीले पहिलो ओभरको चौथो बलमै ओपनर दीलिप नाथलाई शून्यमा गुमायो । अर्का ओपनर ड्यानियल लरेन्स पनि शून्य रनमै दोस्रो ओभरको पहिलो बलमा आउट भए ।
चौथो ओभरको चौथो बलमा टिमको स्कोर ७ रन हुँदा सन्दीप सुनारलाई गुमाएपछि दबावमा आएको थियो ।
धनगढीका शीर्ष स्थानका कुनै पनि ब्याट्सम्यान चल्न सकेनन् । कप्तन दीपेन्द्रसिंह ऐरी १ रनमा आउट भए भने सौरभ खनाल ८ र दिलिप नाथ शुन्य रनमै आउट भए । विदेशी खेलाडी पिटर ट्रेगोले २७ रन बनाउँदै इनिङ्सलाई सम्हाल्ने कोशिस गरेका थिए तर, उनी पनि भुवन कार्कीको बलमा क्याच आउट भए । त्यस्तै योगेन्द्रसिंह कार्कीले १७ रन बनाए ।
बलिङतर्फ चितवनका लागि सुन्नी पटेलले ४ विकेट लिए भने भुवन काकी र स्मित पटेलले समान २/२ विकेट हात पारे ।
यसअघि टस हारेर ब्याटिङको निम्तो पाएको चितवनले २० ओभरमा ५ विकेट गुमाएर १९३ रन बनायो । उसको सुरुवात निकै राम्रो रहृयो । अनिलकुमार साह र हरिशंकर साहले पहिलो विकेटका लागि १०१ रनको साझेदारी गरे ।
हरिशंकरले ५३ रन बनाए । अनिल ३७ रनमा आउट भए । सन्नी पटेल २६ रनमा अविजित रहँदा समिट पटेलले २४ रन जोडे । कप्तान पारस खड्काले १९ रन बनाए ।
चितवन यसअघि पहिलो खेलमा बुटवल ब्लास्टर्ससँग ७० तथा दोस्रो खेलमा घरेलु टोली पोखरा पल्टनसँग ५ विकेटले पराजित भएको थियो ।
प्रकाशित मिति: मंगलबार, कात्तिक १३, २०७५
