रसियामा सम्पन्न विश्वकप फुटबलमा विजेता फ्रान्सका डिफेन्डर बेन्जामिन पाभार्डको गोल उत्कृष्ट चुनिएको छ । विश्व फुटबलको सर्वोच्च निकाय फिफाले पाभार्डको गोल रूस विश्वकपकै उत्कृष्ट गोल भएको जनाएको हो ।
विश्वकपमा भएका जम्मा १६९ गोलमध्ये उत्कृष्ट गोलको छनोटका लागि फिफाले १२ गोललाई अनलाइन भोटिङमा राखेको थियो । भोटिङका आधारमा पाभार्डको गोल उत्कृष्ट चयन भएको हो । पाभार्डले अर्जेन्टिनाविरुद्धको प्रि क्वार्टर फाइनल खेलमा डी बक्स बाहिरबाट लामो प्रहार गर्दै गोल गरेका थिए ।
यस्तै, कोलम्बियाका जुवान क्विनटेरोले गरेको गोल दोस्रो र क्रोएसियाका लुका मोड्रिचको गोल तेस्रो भएको छ भने चौथोमा पोर्चुगलका रोनाल्डो, पाँचौमा अर्जेन्टिनाका मेसी, छैठौंमा रसियाका डेनिस चेरेशसिभ, सातौंमा बेल्जियम नाचेर चादिल, आठौंमा नाइजेरियाका मुसा, नवौंमा पोर्चुगलका रिकार्डो र दशौं नम्बरमा जर्मनीका टोनी क्रुस रहन सफल भएका छन् ।
प्रकाशित मिति: बुधबार, साउन ९, २०७५
