कोलम्बियालाई पेनाल्टी शुटआउटमा ४–३ गोलअन्तरले पराजित गर्दै इंग्ल्याण्ड जारी विश्वकपको क्वार्टरफाइनलमा प्रवेश गरेको छ । इंग्ल्याण्ड सन् १९६६ को च्याम्पियन टोली हो ।
मंगलबार राती स्पार्टाक एरिना रंगशालामा निर्धारित र अतिरिक्त समयमा दुवै टोलीले एक एक गोलको बराबरी खेलेपछि खेल पेनाल्टी शुटआउटमा गएको थियो ।
पेनाल्टीमा इंग्ल्याण्डका एक र कोलम्बियाका दुई खेलाडीको गोल हुन सकेन । जोर्डन हेण्डरसनको प्रहार आर्सनलका कोलम्बियाली गोलरक्षक डेभिड रामिरेजले बचाएका थिए । कोलम्बियाका आन्द्रेस युरिवको पेनाल्टी क्रसबारमा लागेको थियो भने कार्लोस बाक्काको प्रहार इंग्लिस गोलकिपर जोर्डन पिकफोर्डले बचाएका थिए ।
कोलम्बियाका कप्तान रामाडेल फाल्काओ, लुइस मुरियल र जुहान कार्डाडोले गोल गरेका थिए भने इंग्ल्याण्डका कप्तान ह्यारी केन, मार्कोस राशफोर्ड, केरन ट्रिपियर र इरिक डायरले गोल गरे ।
प्रकाशित मिति: मंगलबार, असार १९, २०७५
