विश्वकप फुटबल अन्तर्गत आज प्रि क्वाटरफाइनलका दुई वटा खेल हुनेछन् ।
पहिलो खेल नेपाली समयअनुसार बेलुकी ७ः४५ बजे स्पेन र रुसका बिचमा हुनेछ ।
समुह बी को विजेता स्पेनले समूह चरणमा ईरानलाई हराएको थियो भने पोर्चुगल र मोरक्कोसँग बराबरी खेलेको थियो । आयोजक रुस भने समुह ए को उपविजेता बन्दै नक आउट चरणमा उक्लिएको हो । रुसले समुह चरणमा साउदी अरेबिया र ईजिप्टलाई हराउँदा उरुग्वेसँग पराजित भएको थियो ।
यो खेल राजधानी मस्कोस्थित लुझ्निकी रंगशालामा हुनेछ ।
आज हुने दोस्रो खेलमा राती ११ः४५ बजे निझ्नी नोभ्गोरोद रंगशालामा क्रोएसिया र डेनमार्क भिड्नेछन् । क्रोएसिया समुह डि को विजेता तथा डेनमार्क समुह सि को उपविजेता बन्दै राउण्ड अफ सिक्सटिनमा पुगेका हुन् ।
समूह चरणमा अर्जेन्टिनालाई ३–० ले हराएको क्रोएसियाले नाईजेरिया र आईसल्याण्डलाई पनि पराजित गरेको थियो । डेनमार्कले भने पेरुलाई १–० ले हराउँदा अष्ट्रेलिया र फ्रान्ससँग बराबरी खेलेको थियो ।
प्रकाशित मिति: शनिबार, असार १६, २०७५
