समूह चरणका खेलहरु सकिएसँगै विश्वकप फुटबलको यात्रा नकआउट चरणमा पुगेको छ । सहभागी ३२ राष्ट्रका टिमहरुमध्ये १६ टिम घर फर्किएका छन् भने बाँकी १६ टिम यसपछि खेल्न पाउने छन् ।
शनिबारबाट सुरु हुने नकआउट चरणका खेलहरु मंगलबारसम्म चल्नेछन् ।
यस्तो छ, नकआउट चरणका खेलहरुको समय तालिका :
नकआउट चरणको पहिलो खेल शनिबार राति ७ः४५ बजे फ्रान्स र अर्जेन्टिनाका बिच हुनेछ । समूह सीको विजेता फ्रान्सले समूह डीको उपविजेता अर्जेन्टिनासँग खेल्ने भएको हो । फ्रान्स समूूह चरणमा सहज जित हात पार्दै नकआउट चरणमा पुगेको टिम हो भने अर्जेन्टिना मुश्किलले समूह उपविजेता बनेको हो ।
शनिबार राति ११ः४५ बजे समूूह ए को विजेता उरुग्वे र समूूह बीको उपविजेता पोर्चुगल खेल्नेछन् । उरुग्वे समूूह चरणका सबै खेल जित्दै ९ अंकका साथ प्रि क्वार्टरफाइनलमा पुुग्दा पोर्चुगल भने ५ अंकका साथ समूहको उपविजेता बनेको थियो ।
आइतबार राति ७ः४५ बजे समूह बीको विजेता स्पेनले समूह एको उपविजेता घरेलु टोली रुससँग खेल्नेछ । रुसले समूह चरणमा राम्रो खेल प्रदर्शन गर्दै अर्को चरणमा स्थान सुरक्षित गरेको हो । आइतबार राति ११ः४५ बजे समूह सीको उपविजेता डेनमार्क र समूह डीको विजेता क्रोएशिया खेल्नेछन् ।
सोमबार राती ७ः४५ बजे समूह ईको विजेता ब्राजिलले समूह एफको उपविजेता मेक्सिकोसँग सोमबार खेल्नेछ भने ११ः४५ बजे सुरु हुने अर्को खेलमा समूह जीको विजेता बेल्जियम र समूह एचको उपविजेता जापान खेल्नेछन् ।
मंगलबारको पहिलो खेलमा राती ७ः४५ बजे समूह एफको विजेता स्वीडेन र समूह ई को उपविजेता स्वीट्जरल्याण्ड आमनेसामने हुनेछन् भने राती ११ः४५ बजे समूह एचको विजेता कोलम्बिया र समूह जीको उपविजेता इंग्ल्याण्डबीच प्रतिस्पर्धा हुनेछ ।
नकआउट चरणको सुरु भएसँगै प्रिक्वार्टर फाइनलका खेलहरुबाट ८ टिम बाहिरिनेछन् भने बाँकी ८ टिम क्वार्टरफाइनल चरणमा प्रवेश गर्नेछन् ।
प्रकाशित मिति: बिहीबार, असार १४, २०७५
