काठमाडौं । विश्वकप फुटबल अन्तर्गत समूह डी अन्तर्गत सोमबार राति भएको खेलबाट क्रोएसिया र अर्जेन्टिना क्रमशः विजेता र उपविजेता बन्दै अन्तिम १६ मा पुगेका छन् ।
शतप्रतिशत नतिजाका साथ क्रोएसिया विजेता बनेको छ भने अंक ४ सहित अर्जेन्टिना उपविजेता बनेको छ ।
क्रोएसियाले आइसल्याण्डलाई २–१ ले हराउँदा अर्जेन्टिनाले नाइजेरियालाई पनि २–१ कै अन्तरमा हराएसँगै अर्जेन्टिना समूह उपविजेताका रुपमा अन्तिम १६ मा पुग्न सक्यो ।
मार्कोस रोजोको गोलसँगै अर्जेन्टिना विश्वकप फुटबलको नकआउट चरणमा पुगेको हो ।
रुस विश्वकपमा राम्रो प्रदर्शन गर्न नसकेको अर्जेन्टिनालाई अघिल्लो चरण पुग्न यो खेल जित्नै पर्ने थियो र अर्को खेलमा क्रोएसिया नहार्नु पर्ने थियो ।
खेलको १४ औं मिनेटमा लिओनल मेस्सीको उत्कृष्ट गोलबाट अर्जेन्टिनाले अग्रता लिएको थियो । तर, दोस्रो हाफको सुरुमा नै पेनाल्टीमार्फत गोल खाएपछि अर्जेन्टिनी समर्थकहरुमा निराशा छाएको थियो ।
खेल १–१ को बराबरीतर्फ उन्मुख भएका बेला रोजोले ८६ औं मिनेटमा उत्कृष्ट गोल गरेका थिए ।
समूहकै अर्को खेलमा क्रोएसियाले आइसल्याण्डलाई २–१ गोल अन्तरले पराजित गरेको छ । पहिलो हाफ गोलरहित बराबरीमा टुंगिएको थियो । खेलको ५३ औ मिनेटमा क्रोएसियाका मिलन बादलेजको प्रहार गोलमा परिणत भएको थियो । ७६ औं मिनेटमा सिगरशनले बराबरी गोल गरेका थिए ।
तर ९० औं मिनेटमा क्रोएसियाका लागि इभान पर्सीले निर्णायक गोल गर्दै समूह चरणमा अपराजित यात्रा कायम राख्न सफल बनाए ।
समूह डीबाट विजेता बनेको क्रोएसियाले प्री क्वार्टर फाइनलमा समूह सीको उपविजेता डेनमार्कसँग भिड्दा समूह डी को उपविजेता बनेको अर्जेन्टिना समूह सीको विजेता फ्रान्ससँग प्रतिस्पर्धा गर्ने छ ।
प्रकाशित मिति: मंगलबार, असार १२, २०७५
