काठमाडौं । विश्वकप फुटबलमा आजबाट तेस्रो चरणका खेल सुरु हुँदैछन् । आज समूह ए र बी का चार वटा खेल हुनेछन् ।
नेपाली समय अनुसार बेलुकी ७ः४५ बजे सुरु हुने खेलमा समुह ए का रुस र उरुग्वे खेल्नेछन् । सामरा एरिनामा हुने यस खेलबाट समुह विजेताको टुंगो लाग्नेछ । दुबै टोली सुरुवाती दुई खेल जित्दै राउण्ड अफ सिक्सटिनमा पुगिसकेका छन् ।
सोही समयमा भोल्गोग्राद एरिनामा साउदी अरेबिया र ईजिप्ट आमने सामने हुनेछन् । सुरुवाती दुई खेल हार्दै समुहबाटै बाहिरिएका यी दुई टोलीबीचको भिडन्त प्रतिष्ठाको लडाई मात्रै हुनेछ ।
राति ११ः४५ बजे समुह बि का दुई खेल हुनेछन् । सारान्स्क शहरको मोरदोभिया एरिनामा पोर्चुगल र ईरान भिड्नेछन् । दोस्रो चरणमा पुग्न पोर्चुगललाई यो खेलमा कम्तिमा बराबरी गर्नुपर्नेछ । इरानको लागि भने खेल जित्नैपर्ने दबाब छ ।
समुहको अर्को खेलमा स्पेन र मोरक्को भिड्नेछन् । मोरक्को समुह चरणबाटै बाहिरिएको छ भने स्पेन ४ अंकसहित शीर्ष स्थानमा रहेको छ । समूहबाट अर्को चरणमा उक्लिन स्पेनका लागि यो खेल कम्तिमा बराबरीमा सकाउनुपर्नेछ ।
प्रकाशित मिति: आइतबार, असार १०, २०७५
