काठमाडौं । विश्वकप छनोटको अभ्यास खेलमा नेपालले यूएईलार्इ पराजित गरेको छ ।
२९ ओभरमा छोट्याइएको खेलमा नेपालले युएर्इ माथि पाँच विकेटको जित निकाल्यो । नेपाललार्इ यूएईले १७२ रनको लक्ष्य दिएकोमा नेपालले पाँच विकेट गुमाएर लक्ष्य भेट्टायो ।
नेपालको सुरुवात राम्रो रहेन । १६ रन जोड्दा पहिलो विकेट गुमाएको नेपालले ३९ रन बनाउँदा तेस्रो विकेट गुमाइसकेका थियो । थप ३० रन जोड्दा कपतान पारस खड्का पनि व्यक्तिगत २८ रनमा आउट भए । तर, शरद भेषावकरले पाँचौं विकेटका लागि दिपेन्द्र सिंह ऐरीसँग ५७ रनको साझेदारी गरे ।
दिपेन्द्र ४१ रनमा आउट भए । त्यसपछि अरिफ शेखले शरदसँग मिलेर जित दिलाए । शरद ४१ रनमा अविजित रहँदा आरिफले नटआउट २३ रन बनाए ।
यसअघि टस जितेर पहिले ब्याटिङ गरेको यूएईले २८.५ ओभरमा सबै विकेट गुमाएर १७१ रन मात्र बनाएको थियो । उसले पछिल्लो २ ओभरमा मात्र ५ विकेट गुमायो । २९ औं ओभरमा करण केसी एक्लैले तीन विकेट लिएका थिए ।
उसका अस्फाक अहमदले सर्वाधिक ४२ रन बनाए ।
नेपालका ललित सिंह भण्डरी एक्लैले ४ विकेट लिए भने करण केसीले ३ विकेट हात पारे । ललित नारायण राजवंशीले २ विकेट लिँदा पारस खड्काले १ विकेट हात पारे ।
प्रकाशित मिति: सोमबार, फागुन १४, २०७४
